((( قصـــــر دخفـــه )))

سالم محمد اليامي · #1 25-11-2007, 08:31 PM

بسم الله الرحمن الرحيم
السلام عليكم ورحمة الله وبركاته

ياقصر دخفه لايجي خاطرك شيـن=والوعد انا ويّـاك عيـد الضحيّـه
ياقصرنا قصر الشيوخ السلاطيـن=أهل الوفا والطيب وأهـل الحميّـه
ياقصر ابوي اللي رثـوه الوفييـن=وناحت علـى فرقـاه كـل بدويّـه
ياقصر دخفـه ياوكـور الشياهيـن=ماتنطفي ضـوّك وذا العيـن حيّـه
ياقصر عندي لك عذر واسمعه زين=أسمـع ولـو ماللـعـذر قابلـيّـه
عذرٍ يرج القلـب قبـل الشراييـن=وعذري ورب البيت ماهو شويّـه
تدري وش اللي مبطيٍ باحمر العين=إنـي أجيـك وراحتينـي خلـيّـه
عذري لفاك ودوّن العـذر تدويـن=وخـل المغنـي يضبـط الشاذليّـه
ليـت الوليـد يدفنـي بالملاييـن=ولاّ يخليـنـي بقـامـة خـويّـه
ولا ينغنغنـي بشـاصٍ ورنجـيـن=ولاّ بقصـرٍ مـن سمـوّه هـديّـه
ولا ترى بشكيه لكن علـى ميـن؟=مالي ومال أهل الخطـوط القويّـه
وازرعك يادخفه نخيـل وبساتيـن=واجعلك دره فـي عيـون البريّـه
البارحه غنيـت والنـاس ممسيـن=ضايـق وفينـي ضيقـةٍ عالميّـه
ماهي بضيقه من هلات الفساتيـن=إلا مـن حظـوظ الزمـان الرديّـه
كبدي تُغش وداخـل الكبـد ناريـن=وكاتم لهبهـا بيـن هـذي وذيّـه
لكـن جوالـي يعيـد الموازيـيـن=ويبدل أوضـاع العيـون الشقيّـه
لادقت إللي كل عمـري لهـا ديـن=فديتها فـي كـل صبـح وعشيّـه
فديتها بالعـرض والطـول آميـن=ويالله عسانـي فـدّوة الحُفلـيّـه
ست الحبايب ساحرتني بسحريـن=أمـي حبيبـة قلـبـي الأولـيّـه
لارن جوالـي وقالـت هلاويـيـن=قلت أرحبي ثـم أرحبـي ياسعديّـه
تبغى تصبحني بصبـح البداوييـن=صبح القلوب الواصـلات الوفيّـه
وابسط معاها لين أفـل الحجاجيـن=وفي صوتها الرنـان لـي جاذبيّـه
وانسى العذاب وحزة الهم والشيـن=وتنشط خلايـا المـخ بالشاعريّـه
واجيب مايطرب عقـول الفطينيـن=وما يكسر أهل الجهـل والجاهليّـه
ومايثبت إن الراي ماهـو براييـن=وما يسقط أهل الـزور والعنجهيّـه
وقلبي كذا واحـد ولاهـو بقلبيـن=وفطرة شعر ياأهل العقـول الغبيّـه
ولا أعرف التنقيح ولا التلاحييـن=ومستفعـلان وطـقـة الفاعلـيّـه
ومن غير لا ضمه وشده وتنويـن=والعجز بعد الصدر تسمـع دويّـه
وإذا مدحت أمدح من الناس غاليين=غالييـن ولهـم داخلـي مقدريّـه
أحب أنـا شمـر كعـام المعاديـن=ولبيـه للعتبـان ليـن الحـويّـه
ولبيه للمطـران ومطيـر عاليـن=ويشوش راسي لأعتـزت وايليّـه
ولنا مع السبعان جدٍ وجدين=لاعودة بين العرب طايفيّه
وعيال حرب اللي على الحرب ضارين=سقم الحريب اللي نواهم بسيّه
وإذا أعتزى عند الدواسر وراعين=ماكنـي إلا مـن بطـن دوسريّـه
ولأجل الدواسر ندبل البيت بيتيـن=جيرانـنـا ومعقلـيـن المطـيّـه
ولاعاش من لا يحتمي في القحاطين=ذولا محلفنـا لاغـدت عنصريّـه
وكل القبايل نعـم فيهـم ونعميـن=لوكـان ماجبـت الأصـول البقيّـه
وأنا من اللي في المجالس سلاطين=صبيان يام إن صار بالوقـت هيّـه
على الخيول تقول مثل الشياطيـن=تقبل بنـي عمـي سريّـه سريّـه
لما أقبلت غيثٍ سقى كبد ضامييـن=طب الخـرام وروسهـا ضيغميّـه
وأن دبرة كنها زعـوط المجانيـن=منيـةٍ تمـلا حـيـاض المنـيّـه
صبيان يام اللي تقـص الميادييـن=أهل السيوف الحـدب والصيرميّـه
وانا ولد غدى على العسر والليـن=تباشروبـي ياقبـايـل أرضـيّـه
ياقصر دخفه وين وديتنـي ويـن=وقـف وسجـل كلمتيـنٍ وصيّـه
لوعشت في الدمام عـامٍ وعاميـن=والله ماينسى الخوي مـن خويّـه

وسلامتكم
سالم اليامي

بنــ ياااام ــت · #2 25-11-2007, 10:59 PM

شدني هالبيت مدري ليه

وإذا أعتزى عند الدواسـر وراعيـن000ماكنـي إلا مـن بطـن دوسـريّـه

بيتـ جميــل

صح لسااااانكـ ع هالرائعه

فهد بن مطلق · #3 25-11-2007, 11:06 PM

سالم الله يصحح السااانك

لواهنت على الابياات الراااائعه

تقبل مرووري

سالم محمد اليامي · #4 27-11-2007, 02:40 AM

اقتباس:

المشاركة الأصلية كتبت بواسطة بنــ ياااام ــت

شدني هالبيت مدري ليه

وإذا أعتزى عند الدواسـر وراعيـن000ماكنـي إلا مـن بطـن دوسـريّـه

بيتـ جميــل

صح لسااااانكـ ع هالرائعه