غرام بدويه

الرحال · #1 10-10-2004, 01:16 PM

يا بنت ياللي ما تحني عليه= ياللي جمالك ما يحجبه لثامي

خفي علي يا بنت يا سولعيه= ترى النظر منك يخلخل عظامي

تكفي ارحمي نظرات عينك قويه = مهما شربت أبقا من الشوف ظامي

وأنوح نوح الذيب بالجرهديه= أبدي السلام وما تردي سلامي

شالله بلاني في غرام ابدويه= أنا اشهد اني ضعت ويا غرامي

وانا اشهد اني صرت منك ضحيه= العين تشكي والحشا منك دامي

أقضي الليالي هاجسي همهميه= شوفك كما القهوه مسبب خرامي

أقول دايم لا خذتني الحميه=بسرق لك النظره وكني حرامي

وإذا لمحتك قلت والله شويه= لا ما روتني وما تحقق مرامي

أخذي حياتي ونور عيني هديه= ياللي حرمتي العين حلو المنامي

وأخذي كلامٍ من خفوقي وصيه= وليّاك تنسي عقب موتي كلامي

انا عشقتك دون كل البريه= واهديت لك حبي وكل احترامي

ولا انا مبطي مخلي الرديه= ويوم ان عرفتك قلت بدري فطامي

العشق فيني مو براحة يديه= وعنده يهون الدمع وحتى مقامي

سرب بعيونك ما ترده سريّـه=عجزت أسميه 00 ما اسعفتني الأسامي

تكفي ارحميني وارفقي يا جوديه = أنا نخيتك يا صبية عمامي

إنتي بدويه والبداوه حميّـه = وطبع البداوه يجعل الدم حامي

واللي حصل منك بحقي خطيه = قلبي تحطم وما رحمتي حطامي

خفي علي بالعين تيه وتيه= وخليني أعلن دونهن انهزامي

وأسلم المحزم مع البندقيه=اخذي سلاحي والحقي به حزامي

لكن رجيتك دام بي روح حيه= خفي عليها ولا تزيدي بملامي

بالهون بالهون في الهوى يا بنيه= خفي ذبحني في بعادك هيامي

قلبي تبعثر بين روحه وجيه= وأصبح نهاري مكتسي بالظلامي

خوفي من أهلي يطلبونك بديه= إذا افقدوني وما دروا وش علامي

وأنا سبب عينك غدت بي هميه = دمعٍ تحدر من نويتي خصامي

أنا رجيتك خافي الله فيه= ياللي غرامك بالنواظر يسامي

اخوكم الرحال