مهموم انا يا عمِّ والهم قتّال==== خِنْجَرْه دمع وْطول صَفْن وْسكاير

جرير شمر · #1 21-04-2010, 02:33 PM

لا تستبيح الجرح

لا تستبيح الجرح والجرح ولوال= إنسى وهات عْلوم ربع "المَغَايِر"
سُؤالك عْن الحال يا ذيب مدخال =لصْراع ما عانوا عليه النصاير
واحذر تزيد الحمْل ميله الا مال= مثلك فشق للمعتدي دوم ثاير
واهدا ترى ما هدني ظيم عَيَّال =عمك كسرْه فْراق حلو الظفاير
وافطن ترى ماني بْحاجه لِعِقّال=ابكي على عمرٍ له سْنين حاير
عمرٍ تعقل قبْل عِرْفي لَلَاْمْثال =واليوم شوفه يا عضيدي نثاير
يا ذيب واللي صوَّرك باحسن احوال =انك تساوي في عيوني عشاير
ويا ذيب كلماْ اْشُوفِكِ بْطيش تختال= اطرد بِشوفِك همِّ مِبطي وجاير
ويا ذيب ليت اْجر العباير فرج حال= والله لابل الدرب دونك عباير
ويا ذيب لو انَّ اْلْسراير بِتِنْقال= مَ تشوف عمِّك مَرْمَرَتْه اْلْسراير
خاويت انا يا عمِّ في عمري رْجال= ومن خوِّتي للبعض ذقت المراير
احدٍ لعب في رفقتي لعبَ اْلَاْطفال= واحدٍ تعدى بي حُدُود العزاير
واحدٍ تهقوى زلّتي...داج طبّال= متقفِّيِ دْقاق الحكي والصغاير
احدٍ عن دْروب النواميس ميّال= واحدٍ ورا ركبَ اْلْنِّقيصات ساير
احدٍ بنى من بوقَ اْخُوْيَاهِ تِمثال =وِمْنَ المعاصي والحيل والكباير
ذي رفقتي ما بين خاين ومحتال= الله وكيلك والحصيله خساير
لكنهم رغم المتاعب وَاْلَاْنْكَال= ما ورثَّوا درهم رمدْ لَلْبصاير
والدمع ذا يا عمِّ له عمْر همّال =الدمع باقي من ركام الدواير
الدمع ذا فرقى صويحيب ما زال= له في ضمير العمْر عمْر ومصاير
اللي مثيله يَ ابْنِ ابِن دمِّيِ اقْلال= ماله على وجه البسيطه نظاير
راح وْكسر من روحِتِه عزِّ رجّال= يا ليتِ تَنفع ما كِسَرْهَ الجباير
مهموم انا يا عمِّ والهم قتّال= خِنْجَرْه دمع وْطول صَفْن وْسكاير
الهم حرٍّ ماكره قهْر واذلال =له مخلب بلَّتْه دمّ الضماير
الهم مركب والعُمُر فيه رحَّال= يرسي بِشوفك يا بعد كلّ ساير
يا ذيب عندي شوفتك وانت تختال= تسوى بشر ما بين "جابر" وِ"باير"

للتحميل 3 ميجا

http://www.7looo.com/uploader//view.php?file=6ac05a61b8