السلام عليكم
انقل لكم قصيده جديده للشاعر علي مبارك بن عامر الكدادي مرثية في خاله محمد بن عبيد الكدادي الذي انتقل الى رحمة الله قبل اقل من شهرين
ياحروف الشعر وينك قربي=ودي ارثي واحدٍ ماله مثيل
قربي تكفين لبي مطلبي=وسط جوفي ماكنٍ حزنٍ ثقيل
ياخبر مفجع علي زاد اتعبي=افجعوني بالخبر وانا عليل
يوم الاثنين انسلب خالي سبي=حلّت الفرقا ولحظات الرحيل
رحت له والهم يدبيبي دبي=مثل منهو ماشي ابليا دليل
وجهتي ثلاجة الموتي وابي=شوفته بالعين قالوا مستحيل
وازهم اموظف وجاوب يصعبي=ناخذك صوبه وقلت انتا هبيل ؟
ذا انا وياه وافهم ياصبي=شي واحد شوف لك قولٍ بديل
قال عجل لايطب امعزبي=قلت له لحظات ماوالله أطيل
شفته وراسي مكاني داربي=وفي خفوقي ولعّت نار الفتيل
ويوم في الشعبه دفنته صاربي=حرقةٍ بالقلب مَعْ جرعات ويل
ويوم اشيل النعْش فوق المنكبي=متجه للقبر ودموعي تسيل
قلت والله راح منهو يكسبي=للمراجل راعي المد الجزيل
ندعي المولى عسى له يكتبي=جنة الفردوس ياربٍ فضيل
جعل خالي يارده حوض النبي=وفي نعيم ويشرب امن السلسبيل
عقب خالي ماهنالي مشربي=لا ولا زادي ونومي والمقيل
والله ان حزني سواة التغلبي=المهلهل طول وقته في عويل
ضاق بي الكون شرق ومغربي=عقب منهو بالعرب جنسه قليل
فاقدينه لابته والاجنبي=وفاقدينه عايلات الها يعيل
وفاقده طفلٍ صغيرٍ يلعبي=ناشدٍ عن جده القرم الاصيل
وكلنا نبكي عريب المنسبي=دايمٍ نبكيه في صبحٍ وليل
والعوض في الخال راع الواجبي=خالي هادي ياعسى عمره طويل
وفي مبارك نجله الحُر الأبي=وباقي اخوانه هل الفعل الجميل
وختمها نرفع يدينا نطلبي= ياعسى ابن عبيد في الجنة نزيل
17-11-2011, 11:05 AM
العرض العادي
