شــــرقـــي الـــرقـــه

[ناصر بن فالح]

السلام عليكم

متواضعه

رقمي من البندري وانوار ومنيره= طلاب راعيه حق ... وماخذا حقّه

ماغير اسدّد على اصحابي فواتيره=وفي مجلسي .. ماعرفت اللهو والشقّه

متماسكٍ من فضل ربي وتيسيره=الى نهار الثلاثا شرقي الرقّه

امرايش ونظره وغمزه وتاشيره=من طقّة البرقع اللي حيّ هالطقّه

بإقبالته يذبح .. ويذبح بتدبيره=وان هزها .. يابري حالي ويارقّه

حاولت اطنش ولكن قوّ تاثيره=ماتنفع بقوّته تعلومه وطقّه

اعطيته الرقم بيده .. يالله الخيره=ومن يوم جاه انطر يدقّه ولادقّه

يالفارع اللي مانافس سيرتك سيره=ياقمة الذوق والاحساس والرقّه

اخذت زين العرب واخذت تشفيره=ان كان تقدر تبقي للعرب بقّه

وش لك بقلبٍ ملاه الشوق والحيره=ينطر مهاتفك بالتحديد والدقّه

ان كنت من قوم ( ابودقّه وتسكيره )= عادي لاسكرت .. لكن بسمع الدقّه