هنا إجابات شعراءنا في موضوع ( جوابك شعر ) ..! متجدد ..!

[خالد بن رمثان]

السلام عليكم ورحمة الله وبركاته

....................................


مثل ما وعدتكم بـ مشاركات مميزه و زحمة إبداع في موضوع ( جوابك شعر )

الموجود في هذا الرابط


http://www.alajman.net/vb/showthread.php?t=110786

بدينا مع أول الشعراء المشاركين و هو شاعرنا ( سلمان بن ضيدان ) ..


صدق إني ثقلّت عليه بالأسئله لكنه كفو



1- من هو سلمان بن ضيدان ؟

شاعر ولي في ساحة الشعار والقلطه إسم = وأبيع في سوق المعاني بالمعاني وأشتري
أمرر الألغام للشعار واللي مافهم = لا يدحم الشعار في جنبه وهو جنبه طري
واللي مكذبني من أهل المعرفه ياكل شحم = الملعبه تعدل لو العربان قامت تفتري
أسعى لفعل الطيب لين يقال ( سلمان ونعم ) = وأشوم دايم عن مخاواة الردي والسرسري

2-أوصف لنا حال الشعر و الشعراء ؟

ما عاد به شاعر ولا به مشاعر = ما فيه غير اللي يغث الكبودي
لا قلت له تراك منته بشاعر = قال أنت يعني اللي بترقى سنودي ؟
ما كنه ألا سارحً فالأباعر = خارج نطاق التغطيه والحدودي
جاهل ودربه لا مشى درب واعر = ما يارد ألا ناشفات العدودي

3- (فمان الله يا أغلا من سكـن بيـن الضلـوع وهـام
فوادي فـي غـلاه .. بحاضـر الدنيـا وماضيهـا )

لو كان البيت هذا مهوب لك و جاك مسج على جوالك وش بيكون ردك عليه ؟

فمان الله يامن في فراقك ما قدرت آنام = فمان الله والنيران تاكل رجل واطيها
أيمم وجهي القبله لو أنها ما تبي يمّام = وألاقي صورتك قدام عيني يا محلّيها
وأغيّر يمّتي وألد عيني شرق ولا شام = أبنساها .. أبنساها وأنا مانيب ناسيها
طلبتك لا تراسلني مدام أن السلام .. ختام = بلاش أرسل لك الأبيات و( العشره ) بننهيها

4- نفرض أن اللاعب السعودي محمد الشلهوب كلفك بكتابة أبيات بلسانه تعتذر فيها عن البلنتي اللي ضيعه في مباراة الكويت و السعوديه ، أطربنا يا بو ضيدان بالعذر ؟

الله اللي كاتب وهذا قراره = والبلنتي ضاع وش حيلة محمّد ؟
الوعد قدام وأولها شراره = نارنا يالعارفه ماهي تخمّد
السعوديه تراها فالصداره = شبّت النيران لين الكل رمّد
والله أن تبطي الكويت امن الخساره = ما لقت لجروحها طب و مضمّد

5- تكلم عن أهمية الصلاه في حياة المسلم ؟

الرسول يقول صلى الله عليه وسلم = من تركها كافر وعن ديننا مرتدّي

6- جمعت مبلغ مليون ريال و شريت فيه ناقه و توفت ثاني يوم ، أوصف لنا شعورك ؟

بقول الله يعوّضنا بدلها = بمليونين دينار ً كويتي

( مع أني ضد اللي يشترون بهذا السعر ) !

7- أمنيتك في الحياه ؟

لا شفت إبي راضي علي وأمي بعد = يهون لي شي ً تمنيته يصير !

إجابات جزله و ممتعه صح لسانك يا سلمان و لاهنت