شيءٍ بغيته لكن الحظ مخطيه !!

[مناحي الصميل]

قديمه متجددّه


اعتبرها تواصل معكم .

كلٍ على فاله تجيه الأماني = وانا الوحيد اللي تحرّى امانيه
يا ليتني لا قلت أحبّه .. لفاني = او قال احبك موت ؟ .. والله لأجيه
لا قال أحبّك .. أدخل بجوّ ثاني = وتصيبني خلّه .. اذا مرّ طاريه
مدري الوم النفس والا زماني ؟؟ = والا ألوم اللي على البعد حاديه !
يا ليته قريّب وأشوفه وزاني = وأمشي معه في كل حزّه وأخاويه
أحسب حساب الليل كنّه ثواني ! = يا حيّ ليلٍ مع حبيبي أقضّيه
لكن حظّي وجهته للطماني = لو كان يشرى الحظّ ؟؟ ... والله لأشريه
أبذكره حتى ولو هو نساني = وانا ادري ان مابه ظروفٍ تنسّيه
لكن همّي وإنتظاري طواني = ويبقى الحزن داخل عروقي مخبّيه
إي والله ان اللي حصل لي كفاني = وشيءٍ تعدّى الحدّ مابيه مابيه
قولوا له ان خلّك حظوظه .. تعاني = شيءٍ بغيته لكن الحظ مخطيه

وسلامتكم .