دره لـ شاعر الكبير \ محمد بن علوش

[(هاوي قصيد)]

مسا الخير

قصيده لشاعر الكبير \ محمد بن علوش

راجي ان تنال اعجاب الجميع ,,,

يا الاجودي والديار موثـــــقه والعرب=تذري اللي من الدنيا تذرّابها

أطباعهم من قبل الاسلام شيمه وأدب=مكارمٍ جا رسول الله ووصابها

الاّ لآمن الخـبيث أشعل حتات الـحطب=بعلوم يقبل بها وأعلوم قفابها

ثعلب يخطط وهو لاهاب هز الذنب=خصٍ لا شاف السباع تكشر أنيابهـا

فكّر وقال الذكي يغلب ولا ينغلب=ويقدر يحوف الديار اللي تمشابها

وأنا ذكي والزمن فيه الفرص من ذهب=وأن ماتغانمتها قفت على مابها

زمن وفيه الذكي يكسب لآمنّه لعب=وإليا كسبها وصل للعين وأهدابها

حتى لو انها عيونٍ ماكساها هدب=يقدر يقول أنت حدر العين يا حْجابها

أنزل مثل مارقيت سنين وأنت تهذب=شف وش تسوّي القلوب السود بحبابها

مع أن حنّا نعيش بعصر فيه العجب=عصرٍ علومه بعضها صعب يحكابها

وشرايك بخمسة أشنابٍ تسد الندب=ساقتهم أنثى !! ما معها غير مشعابها

هو يحسب أن الرجال تصدّقه لاكذب=صحيح من يضحك إبـ لآفات يبلابها

من سمع به قال يكذب؟ ويخسي؟ويعقب=ذي جـرّته فالدروب اللي تلوّابها

خطّط على نكبةٍ منها وفيها أنتكب=يبغا يضر السباع وراح بـسبابها

مايعسف الاّ الذلول وقبل تعسف صَعَب=واليا عسفها بخيصٍ لآنت أعصابها

لو كل رامي يصيب اللي يبي لاضرب=مازلّ الاهداف يومه زان مضرابها

ولو كل راعي شنب يدرآ حقوق الشنب=شفت اللحا تفتخر لآ طالت أشنابها

ولو كل من قال أنا الحلاّل حلّ النشب=تساوت الناس طالبها وطلاّبها

مهوب دايم شجاع اللي لآ ركبوا؟ ركب=كـــم عزوةٍ ماتجمّل من تعزوابها

ذل.؟ و نجتبه ذلوله ياعساها الجرب=بعض الاصايل حسوفه تحت ركـّابها

ولو كل ضامي لآورد أيـّات مشرب شرب=كان المشارب تساوت عند شرّابها

والبلّ لو أنها لا شِعْيَت مالحقـها طلب=كان العرب من لقاله ذود قفـّابها

كم سربةٍ فاللقا يثنون أهلها الركب=ومن المكاسيب لحق الطق فـأرقابها

لو كل من جا يدوّر للمكاسب كسب=شفت القلآيع تحت من لآ تسموابها

البل لو أن مالها من صلب أهلها جنب=يمدي هل الهند في مدراس ترعابها

هذا ولا كل من غنّى يغنّي طرب=كم واحدن عبرته تقرع ولا أفضابها

حتى ولو من حمول الوقت لَحقه تعب=كنّه يقول الحمول تشلّها ركابها

له خاطرٍ كل ماضاقت فجوجه قنـب=يرقابها غصب والا طيب يرقابها

ماينثني لين يوصل طيب والا غصب=الاّ أن سود الليالي تطوي كتابها

عزمه قويّ والبنآدم لاصبر وأحتسب=يمكن يحقق لـ مور اللي تهقوابها

الآدمي لاعرف يقرا الكتابه كتب=واليا جهل يكسب الخبره من أصحابها

((الرجل مبدأ ولامنّه تهاون خرب=وأن خرب ضحىّ بأمورٍ مايضحّابها))

لو ما العوارف يجيدون أمتلاك الغضب=ماجوك برياء يموت الخبل ماجابها

أرياء عقولٍ وهبها الله بعض ماوهب=بحلول بين العباد تخلّص أنشابها

وهآيب تحلّ بأمر الله عسير الكرب=وبأمر الله الناس تقبلهاوترضابها

لله حكمه لآحطّ إلـ كل شيٍ سبب=عطا وأخذ،،وأخذ وأعطا،،وأكمل أنصابها

لو كل من شاف له زلّه وغرّه شذب=كان العرب ماسترها لبسها ثـيابها

ولو كل رجلٍ لامِنه أخطا كفو للعتب=هان العتب من رجالٍ يصعب عتابها

ولو ما بعيد النظر ياخذ عبر ويحسب=ماعاد تلقى رجالٍ يحسب حسابها

ولو أن شيخ الحرم دينه رديّ ماخطب=ولا تيمّم بخلق الله وصلاّبها

وسلامتكم