ياليت الأقدارتبطي ماتجي للكرام

[ابوصقرالهمامي]

هذة القصيدة رثاء أخي الذي لم تلدة أمي عبدالله بن سعد بن محماس الشامري رحمةالله
وأسكنه فسيح جناته

البارح الضيق في صـــدري بنى له خـيام *** وضاقت بي الأرض والأيـــام ماهمها
يــــاليتــها مــاتــردت في رفـيـــع المــقـام *** ولاجــرعتني بعد فـــرقــاه مـن سمها
رفيقي اللي علومه فـــوق صــدره وسـام *** ذي ماأذكــر أنه عطى كلمة ولا تمها
مرحـــوم يااللي مكانك فوق راس السنام *** دنياك ماهيب يمك .. وأغـــرقك يمها
مـــن غـبـت والقلب يـتـحسر بلـيا كــــلام *** ينثر على قبــرك الأحـــــزان ويلـــمها
مـرحــــــوم يااللي ترحب قبل رد السـلام *** تـــرحيبةٍ تــروي العطشان من جـمها
ليت المـقــادير تبـطي مـــاتــجي للكـــرام *** ماكان يمديني أشكي اليوم من غمها
لكن الأقــــدار مــاتحسب لحــزن الأنـــــام *** ولاهـمها مـن مــدح فيها ومـن ذمـها
واليوم مالي سوى أستجدي لقبره غمام *** يسقي ترابه ويسقي الأرض ويعـمها
واطلب له المغفره .. ولنا بحسن الختام *** وتضــم روحــه جنان الخلد ويضمها