(( .. الشعراء .. )) ..!!

[حسن علي الهاجري]

السلام عليكم ورحمة الله وبركاته

اعزائي تحية عطرة ..

قصيده قديمه .. كتبتها ردّا على بعض المتعسرين والمتعسفين والمتملقين والمشككين ..
وهي في عام تقريبا 2004 م وفي هذا العام كان البارزين على الساحه
سلطان ابن وسام وضيدان بن قضعان وعلي بن حمري
مع احترامي لباقي الشعراء وانا ما انتقص احد لكن اقصد الاكثر تواجد في الاعلام ..
واتمنى ان ترتقي لذائقتكم الكريمه ..!

::::::::::::::::::::::

قالوا عـــلامـــك ما تجيد الجزاله = وابيات شعرك ما حوتها خيالات

قلت الجزاله كيف يا اهل الجماله = ابغي كلام ٍ واضح ٍ بالدلالات

قالوا قصيد ((الأكلبي)) لك دلاله = شاعر محنك ما يبيله دعايات

قلت اذكروا لي واحد ٍ من خلاله = اجاري اشعاره بجزل العبارات

هذا عميد الشّعر في كل حاله = بيني وبينه كالجبال المنيفات

قالوا تصبر خلّ عنك العُجَاله = واخذ الاسامي دون نقص وزيادات

سلطان ((ابن وسّام)) وافي مقاله = بالشعر له بصمه وكاسب بطولات

قلت العفو ((سلطان)) مالي وماله = هذا غدى للشعر رمز وعلامات

قالوا ((وابن قضعان)) طوّل حباله= اقرى بيوته كلبوها جميلات

قلت العدل مطلوب يا اهل العداله= ((ضيدان)) ما مثله بنظم الجزيلات

قالوا ((علي)) جزل القصيد انحنىله = فنان في بدع المعاني والأبيات

قلت ابن((حمري)) يا عرب من قرىله = هذا بزغ نجمه بعال ِ السموات

قالوا خلاص الحل قرّب مناله = مطلبك بين من خلال الأجابات

قلت اذكروا ربّ ٍ عزيز ٍ جلاله = طال الكلام وزبدة الهرج غايات

((الشعر)) يا رجال الكرم والشكاله = بشرح لكم معناه من دون ميلات

(( الشعر )) يا شعار نقض وفتاله = ماهوب هرج مصفصفين الحكايات

((الشّعر)) ديوان العرب يا رجاله = ((والشّعر)) بحر ٍ بين شاطي وغبّات

احد ٍ يعومه لين يجني جزاله = واحد ٍ على شاطيه مكسبه رشفات

ومن عصر ((ابوزيد الهلالي)) وآله = لاعصر((ابن لعبون)) و((الشّعر))مامات

((ومحسن)) ((امير الشّعر)) نوّخ رحاله= ((والقاضي)) اللي ضاري ٍ بالثمينات

وشالح ابن هدلان لامن طراله = هجس الشعر جته القوافي مطيعات

وابن عفيشه كرّم الله سباله = سِيده ليا من صار للشعر سادات

وراكان ابن حثلين وثق فعاله = في ابيات تبقى للنشاما شعارات

والعوني اللي ما تجيه العباله = اليا نوى يبدع بيوت ٍ فريدات

والاّ العواجي زاد روعة جماله = اللي ركز في هامة الشعر رايات

وقايد زمام الشعر رمز الأصاله = (صقر) (صقر) شعره على القلب لذّات

((وهذا العطاوي))و((ابن عون))ومثاله = اشعارهم فيها دروس ٍ مفيدات

((والخِسْ)) و((مرشد)) كاسبين الجماله = ونسل (( السديري )) من كبار القيادات

وعبدالعزيز ابن الصباح انبرىله = وروّض صعيبه لين جاب السمينات

وسالم ابن دوّاي خاض ابّساله = واخرج من المكنون لولو ودانات

وذاك ((الهويدي )) ما تعدّد خصاله = ((ومفرح الظمني)) خذاله شهادات

وعندك جزا الحربي بروحه وفى له = وله في جزيل القاف صوله وجولات

والاّ ((خلف هذال)) خله لحاله = (( شاعر)) منصّه ما يبيله اشادات

((والطايعي)) بالشعر تعجب مثاله = ((مطلق)) وله في طيب الشعرعادات

ولو بذكر الشعار وسط الرساله = ما احصي نجوم ٍ في سمانا مطلات

والخوف لا يكشف لنا الوقت عاله = شيء ٍ جديد ٍ والليالي سريعات

في هالزمن يمكن يجي فيه آله = تِبدَع جزيل القاف في كل الأوقات

يا اهل (( الشعر )) لا بد نرفى خماله = ونميّزه يا أهل القلوب اللبيبات

((ومن لا يميز صافيه من حثاله)) = ((بينه وبين الشعر درب ومسافات))


((ومن كان شعره يا عرب دوب حاله)) = ((ما ينفعه لو كبّروه المجلات))

تم الكلام ولا لحقنا كماله = ولا همني هرج النفوس الدنيّات

وصلوا عدد برق ٍ تكاشف خياله = على النبي خاتم جميع الرسالات

::::::::::::::::::::::::

وسلامتكم

اخوكم / حسن بن علي الهاجري