يا وجودي وجد طير ن وصقاره فقير !!

[صالح المري]

ياوجودي وجد طير وصقاره فقير
= تو ماخوى مع الشيخ من ضمن أخوياه
حدته الايام والدين والوقت العسير
= ومن خلق الله والطير ماعمره قناه
مايميز طلع طيره ليا تله أعصير
= وكل ماهده على الطلع من دونه دعاه
والنداوي غلق أسبوع ماذاق النسير
= عرضه برد الهبايب وخطراله عشاه
في حياته مابعد شل ولا هد طير
= وابتلا في الطير والطير فيه الله بلاه
مالقاله من ردى الحظ في الحمله شوير
= والمعزب قدم عينه وديانه وراه
أتوجد وجد طيره وأنا ماني بخير
= لو يفيد الوجد حولت من راس العلاه
منك ياللي تسكن القلب من عادك صغير
= قبل تقرا سورة الحمد وتعرف الصلاه
عاد أهلكم في أول القيض تنزل جال بير
= فوق عد منزله حد عرق من حصاه
وعاد ورد الطرش يومين والثالث صدير
= في آخر المصياف والقيض في أول مبتداه
وعاد أبوك الراي عنده وفي ربعه الأمير
= والجماعه في ذرى الله ومن عقبه ذراه
وعاد بيته في الرفاعه ومفروشه حصير
= شاهق لاشافه الضيف من بعد نصاه
وعاد ضوه من سناها على العارض تنير
= قبل يذن مذن الفجر وأوجاره شعاه
وعاد خيره عند ربعه ويلقاه القصير
= ومايذوق الزاد من دون ربعه واقصراه
وعاد مربط خيلكم حي والسيف الشطير
الصدا ماناش حده وقلل من شباه
= وعاد خطلان اليماني تشار وتستشير
والرفيق ان زل يذخر ويدمحله خطاه
= وعاد قلبك في المدينه مثل عين الضرير
والقصر ماذقت زاده ولا شربت ماه
= وعاد تفكيرك ليا جيت للجم الغزير
كيف أموتك عشق وارجع على قيد الحياه
= كل هذا قبل دورات بقعا تستدير
والسنين تمر والوقت ماتاقف رحاه
= قبل صدك ميسمه يكوي الضلع القصير
يوم بير الغي تومي على جالك رشاه
= كان عشقك غير والحين عشقك صار غير
لو تشوف الضامي الحنج ماتقطع ضماه
= ولا أنا لادلبح النجم وجهه في الغدير
قمت أجر الصوت وأكتب على حيد النباه
= بيت شعر ماكتبه أصمعي ولا جرير
بس يبقا من جماله وترويه الرواه
= أي ليل ماأرى ذالك البدر المنير
أي عشق يقتل العاشقينا وأسفاه
= وياصغير في عيوني وفي قلبي كبير
ليت قلبي برق غيرك ليا شافه رعاه
= كان ماضره فراقك ولا الفرقا تصير
والسهر يقطع نواصيه في سمر الجباه
= ومل قلب مابقا الا من ضلوعه يطير
كل مادقه على الغالي المقفي غلاه
= السهر جاعد شداده وونته البعير
والحزن ضلع المسامه ودمعاته عصاه
= ياقليل الشوق ماعاد من عقبك كثير
الجفا فج الحنايا ومعلوقي زواه
= يابلايه يادوايه ترى وضعي خطير
والبلا اني عارفك يابلاه ويادواه
= والله اني عاقل بس في حبك غرير
واشهد أن القلب مبطي ويبطي في عماه
=لك علي اني أحبك ولو ماني بخير
من غلاك اللي ذبحني ولا منه غناه