لعيون سلمى

[حسين ال الحارث]

لعيون سلمى ننطح القوم ونغير
ونصد عثرات الزمان المولي
ونضرب على جنب الخطوط المشاوير
ماهمني بعد المكان ومحلي
ونارد على أحواض المنايا طوابير
لعيون ريم(ن)تلت القلب تلي
سلمى تقول البارحة جا مسايير
طيفك وصوتك يوم بسمي تشلي
وأقول ياسلمى لعنت المقادير
ولا أنت طيفك مرتسم مثل ظلي
لوشافك الرهبان والقس في دير
ولا سمع صوتك وهمسك وعلي
لاإن كان خصك بالقراية وتكبير
ولا نوالك ركعتين ويصلي
ياصاحبي قدني على إلقاك باطير
ياكيف وأنت الماء لريقي تبلي
قربك حياة وبعدك به الموت غير
ودنيا بلا قربك عساها تولي
أن شفتها تمشي ويمشي بها السير
طاووس جاه أنعاس وممشاة ملي
والخصر قبضة طفل مفطوم وصغير
والردف ياساتر مظلة مظلي
جتني هدية مثل وضح المغاتير
وشف غيرها ياصاحبي ماحصلي
ياروضة التنهات وريح النواوير
مابين صدرة والجبين المعلي
ياطير ياطير السعد عل ياطير
سلمى ترحب فالديار وتهلي
قلت البقا يابنت قوم (ن)مناعير
ياشوق عين إلي يفك ويحلي

الشاعر /حسين ال الحارث اليامي