الا يالله ياللي تحـت هيبـة سلطنتـك اسلمـت=لك المسلم يسبح لك بحمـدك والـك الاسلامـي
احمدك واشكرك واثني عليك بما علـي انعمـت=وزودني وفاء قدر العشيـر وصـل الارحامـي
ولجك الفجر ياليل الذهول اللـي علـي اظلمـت=يعرضك واقع الماضي عليه عـرض الافلامـي
ولهتك يالنديم اللي على صافي وفاك اضرمـت=بصفحة ذكريات العام واللي مـن ورى العامـي
,,
,
بعد تقرير مشوار التجارب نجحـك واجزمـت=بأن السيف يبغى والعصـا والمحـزم احزامـي
ضمنتك راس مالي مكسبي في كـل ماساهمـت=قفلـت ابـواب حيطـان الحسايـف والتندامـي
عطتني عزلة اخلاصي معك نسيان من نادمـت=كتبتك وانطوت صحفي عليك ورفعـت اقلامـي
اباهـي لاابالـي واتبيسـط كــل ماقـدمـت=واشب النـار قـدام العـرب واشيـد اخيامـي
,,
,
نهاري حر شمسه يستحي منهـا لسـان الشمـت=وليلي ترجم انجومه ملامـة كـل مـن لامـي
على ضوء الكلام اللي كشف عنا ستار الصمـت=عرفت اني تحت برق الامل في روض الاحلامي
احسبنـك تيمـم باتجاهـي ويــن مايمـمـت=اثر مانتـه ورايـه بالطريـق ولانـت قدامـي
مصيبه لاتردت قيمتك فـي عيـن مـن قيمـت=يشوفك فالسهـل وانتـه تشوفـه فالسماالسامـي
,,
,
كثر ماحن قلبـي للونيـس وكثـر مادرهمـت=فجر صدري حنيني واتعـب الاقـدام درهامـي
عيون الصد وعيون التجافي "حول"مهما اكرمـت=تشـوف المجتهـد كسـلان والبنـاي هدامـي
مادام ان جانبي شام لجنابك وانت عنـي شمـت=كثر خيرك وانا لاني بـلا جايـع ولا ظامـي
اشوف انه علي واجـب ليـا مريتكـم سلمـت=مرور اكرام تربطها الكرامـه عنـد الاكرامـي
,,
,
على شان الخفوق اللي على عرشه قعدت وقمـت=وحجب عنك الدجا لين اشرقت لك بيض الايامي
ختام السالفه ياطيـب العشـره كرمـت ودمـت=هذا حقك علي وحـق هقواتـي علـى اوهامـي
مصير الوقت يشرح لك دروسه وان غفلت ونمت=يصحيك الزمان اللي يصحي كـل مـن نامـي
تذكرني لامنها خابـت اوهامـك بمـن وهمـت=وعرفت الفرق في حب الخشوم وحب الاقدامـي
16-07-2010, 02:45 AM
العرض الشجري