أكـذب عـلـيك إن قـلت مـانـي بـكـذاب....!

[محمد المجول]

أكذب عليك إن قلت ماني بكذاب=إلا كذبت وكذبتي غصب لنـّي
خايف تخليني بلا عذر وأسباب=هذي الحقيقه...والخطا ماسكنّي
ودي أثيرك..وأفتح لشكك أبواب=وإن ضقت عادي... بنثني لك وأغنّي
( عليك قلبي ذاب ياسيد الأحباب)=(عليك وحدك والمشاعر بلنّي)
لاتتهمني...قلتلك خافقي تاب=عن حب غيرك وإن بغيت إمتحنّي..!
يكفي نفس صوتك على مسمعي جاب=شوق ٍ...يخالطه الغلا والتمنّي
رحلت في كحلك وعينك والأهداب=وطالت مشاوير الغرام..وفتنّي
كل عرق ينبض فيك لين الشعر طاب=ماكنّك إلا...(نبض قلبي ومنّي)
ماقلتلك..! مملوك لك حب وإعتاب..=حتى التجني...راضي ٍ بالتجنّي..!
بتقول لي كذاب..بقول كذاب..=كذبت غلا...كذبتها غصب عنّي..!