مــــــلاك

[يوسف المطيري]

انا لك بالغلا وافي وانا لـك بالفعـل رجّـال
ولكـن لاتخونينـي وتوقـف لـك شياطيـنـي


بقهويك الغـلا دلّـه واقهويـك الدلـع فنجـال
واخلّي صورتك صورة ملاك(ن) ساكنه عينـي


وابرسم لك على دفتر سنينـي بالغـلا تمثـال
أنوّخ عنده عـروق الحشـا لامـن وحشتينـي


وبترك لك مساحات الخفوق لضيقتـك مدهـال
وابي لاضاق بك صـدرك تجينـي أو تنادينـي


أبي لامن رموا كل العرب وقت الكروب عقال
سحبتـي شيلتـك قـدّام وجهـك ثـمْ نخيتينـي


وابي لين امطرت نجل العيون ودمع عينك سال
قسمت الفرحه اللي في خفوقـي بينـك وبينـي


وابهدي لك بدال الدمعتيـن الطاهـره سلسـال
وابمسح دمعتـك يـآ عـزّ خلـق الله بيدينـي


وبحكي لك قبل نومك حكايه من خيـال البـال
وبعرضها قبل نومـك عليـك بمسـرح سنينـي


وبحكي لك حكاية عاشق ٍ قـد ملّـه الترحـال
طواه الليل من عشقـه قبـل ماللّيـل يطوينـي


وبرجع لك واقول انّي على فعل الوفـا رجّـال
ولكن لاتخونينـي .. وتوقـف لـك شياطينـي