جديد

[إبراهيم ال منصور]

بسم الله الرحمن الرحيم

المكاتيب وصلت والعلوم مخبوره=عارفين الجنوب وعارفين الشمالي
الذياب إتعاوا والرخوم محجوره=والعلوم معروفه من قديمٍ وتالي
لكن اليوم علمي من جدايد عصوره=إفطن إلما غزيت وللمعاني توالي
في عروس المصايف خذت لفه ودوره=لا عكست الطريق ولا كسبت الهزالي
ما شربت الهماج اللي لفت به بحوره=وارد من العدود الصافيات الزلالي
يوم غيري كسب فيها ملامٍ وبوره=ما يروم الصواب ولا إستمع للمقالي
همه اليوم كله وصل ساره ونوره=بعد وصل الولايف يصبح القلب سالي
في رضاهم يسوق الهافيه صوب سوره=قد مواطيه في درب الرذايل سحالي
إن بدا في اللوازم ما حسبنا حضوره=لا فرق بالجنيه ولا فرق بالريالي
لو ذراعه طويله قاصراتٍ شبوره=القصور النوايف ما عمرها الثعالي
علمه اليوم بان وبان للناس كوره=من بغا الحق فك مشربكات الحبالي
جاني العلم من غيرك ثم اوحيت شوره=عقب ما قال جاله مثل ما قد جرالي
جعل علمٍ لفاه يكون منزوع زوره=صادقاتٍ حروفه بينٍ ما يبالي
غير ذا العلم نوخ في الحنايا بجوره=بعد قوله طرالي يا عرب ما طرالي
الزمن يا رفيقي ما سلمنا عثوره=والمعاذير صوبك من رفيقك جزالي
ذي علومي بعد عامٍ طوتنا شهوره=لافيتك الرسايل عقب طرح السوالي