عزي لمن يمسي وهو ضايق البال
يواجه اهمومه ولا معه حيله
اليا تجرا جر بالصوت مـــــــوال
واليا انهشم ماخف صالي غليله
توميبه افكاره على بحر الاهوال
محموم وتزود عليه المليله
لا ريح الخاطر ولا منوته طال
اكفوف حظه بالعطايا بخيـــــــله
فيا اللي عاتبك مرني عبر الارسال
لاتلومني وحمول وقتي ثقيله
غلاك غرسه في عروق الهوى طال
الشوق تمره والمحبه نخيله
القا طويفك في مراحي والاقبال
واشم نسمات الغرام العليله
بين العنا والحب حلٍ وترحال
مسجون قلبي كيف بطلق سبيله
ان كان تنشدني عن الوضع والحال
فلا غير خلاق البشر بشتكي له
يا مكبر الهقوه ويا كثر الامال
اجهدت نفسي والمكاسب قليله
ياكم نوى شوقي ملاقا وميصال
ويحول دونك من ظروفي قبيله
عيد الفطر دمعي على الخد همال
لو ناش جرد القاع تصبح ظليله
لاجل الزمان اللي بكثر العنى مال
خلا اقرب شبوح الوهف مستحيله
وعيد الضحيه ساقني العزم رحال
يم الطموح ولا يبيلي دليلــــــه
احث رجلي واطوي اميال واميال
ودي بوردٍ ارتوي سلسبيله
بديت بالنيه وثنيت بافعال
مدام تشعاني بروق المخيله
اخاف من واقع للاحلام قتال
ونين صدري والعنا من جميله
يعني هموم وفوقها ضيق واشغال
منها قوي الباس يركد صهيله
هذا العذر وان ما تكفيك الاقوال
بسري الدروب الموعرات الوحيله
09-01-2012, 06:41 PM
العرض الشجري