البارحه يوم أظلم الليـل وامسيـت

[همس الليل]

هذه قصيده أعجبتني وحبيت أنكم تقرؤنها

البارحه يوم أظلم الليـل وامسيـت= جتنـي ولهفتهـا تسابـق خطاهـا
وقفت حاير واضحكت لي وهليـت= يامرحبـا ياللـي عسيـرٍ لقـاهـا
ماكنت احسبن الفرح لـه تناهيـت= ولا كنت احسب العين بتهـل ماهـا
عزالله إني لأزرق الدمـع هليـت= وساعة هديت إلا وأنا اسمع بكاهـا
قالت لو أدري كـان والله ماجيـت =قلت العفو والعيـن تلقـى جزاهـا
غمضتها لحظه وبالصوت ناديـت =أحرمتها شوفـك سبايـب خطاهـا
ضحكت وقالت والله أنـك تماديـت= لا تحـرم العينيـن لحظـة مناهـا
لكن أنا عنـدي سـؤال ٍ وياليـت =ألقـى جوابـه ثـم لـدّت وراهـا
أنا لو أنـي عـن ودادك تخليـت؟ = وقلبي عهـودك والمحبـه نساهـا
قلت الحزن يومين لو ماتناسيـت= والهاجـره قلبـي بيلقـى سواهـا
زعلت وقالت ما أذكر بحقك اخطيت= هذا جـزا نفـس ٍ صفالـك هواهـا
والله ما غيـرك عشيـر ٍ تمنّيـت= لا يابـري حـالـي ولا ياعنـاهـا
قلت اعذريني كان بالهرج زليـت= كنـت استفـزك بالحكـي وآتباهـا
ياما على شانك صبـرت وتعنيـت= وألحقت نفسي في غرامـك مداهـا
وأزعلت لأجلك غالي الناس واقفيت = نزعل عيون وعين نطلـب رضاهـا
بنيتلك يامهجتي في الحشـا بيـت= مايسكنه غيـر الهنـوف وغلاهـا
ما كنت أصدّق يوم قفّـت وفزّيـت= فزّيت من نومي وانـا فـي رجاهـا
وليت يـاذا الحلـم وليـت وليـت = باقي كـلام ٍ حايـر ٍ فـي شفاهـا
تكفى لوأنـك ماتعجلـت وابطيـت= كـان آتـأكـد زلـتـي بتعفـاهـا
خليتنى لا نـي بحـي(ن) ولا ميـت= ياحلـم تكفـى رح لهـا ياعساهـا
تشوف حالي والحزن والتناهيـت = وترفق بعين ٍ هلـت اليـوم مـــــاهـــــــا