<<راع الــــــولـــــــع>>

[فهيد بن عصيدان]

صباح الخير مدري مسا الخير

اما بعد..

هاذي القصيده مسنّدها على اخي حمد وهي في عمي خالد بن عصيدان
وانا من فتره ودي اجيهم فالبرّ وتعرفون ربيع وخير لكن ظروف الدوام امنعتني
ولكم القصيده..

راع الولع شوف اخضر الروض ودّه=من عقب مابكّر وطاح الوسامي

لاربّع البرّ وكسا النّبت خدّه=هذاك والله يالسنافي غرامي

لي ياحمد فتره طويله ومدّه=وأنا على المرواح شفقن وضامي

واللّي منع منصاي والدرب سدّه=من شوفكم يابو محمّد..دوامي

من كثر مسهر عفت نوم المخدّه=وان نمت والله مهتني في منامي

ودّي..ولكن ودّي الحظّ لدّه=في شوفة ابيوت الشّعر والخيامي

نصّ القصيد..وصوب منصاك ودّه=من مبتداه الين بيت الختامي

صوب الّذي لاجيت له..لاتهدّه=الا مبلّغ له كثير السلامي

سلامٍ أبعد من سكاكا لجدّه=وأكثر من اجموع الجرد التهامي

قلّه ترا هاذا سلامٍ مردّه=من قلبي..وفكري..وزود احترامي

في مدح أبي خالد قصيدٍ بعدّه=ياوين أببدا..وش بقول ابكلامي

راع المجالس..والكرم..والاشدّه=وراع الدلال الفاخرات الشوامي

ذبيحته..لأهل الوفا مستعدّه=في كل يوم الذّبح حامي..بحامي

لامن نصاه الضيف مقبل..يحدّه=تسبق تراحيبه طلاق..وحرامي

ماهوب لاتاجر..ولاورث جدّه=علاقته بالطيب حبّ وهيامي

واللّي بيدّه ماهو ابملك..يدّه=يفنيه لاجوه الضيوف الكرامي

الحظّ ضدّه وأغبر الوقت..ضدّه=ويصبر على جور الدّهر والعوامي

اسنينه اتضده ولاهي تحدّه=ايعسفها عسف الفرس بالخطامي

يضحك حجاجه وقت لينٍ وشدّه=وايحلّها لاثار عجّ وعسامي

الشعر..وش ماقلت ماهوب قدّه=ومقامه أكبر منّي ومن كلامي

وسلامتكم,,