ياذيب ياللي من عنى الشوق منحاس=حافي وتركض بين شمـسٍ و فيـه
الله اكبر من القهر تضرس اضراس=بيمنـاك تلمـع سلـة الحضرميـه
خل الظنون وخذ كلامك من الـراس=ان كان لك مـع صاحبـك قابليـه
احذر تسمع هرج حاسـد و بـلاس=اللـي لهـم تسعيـن نيـه ونيـه
خابرك تاخذ لك على الخيل مرواس=ولاتلتفـت للضالـعـه و الونـيـه
وانا سمعت وسمع غيري من الناس=لاكـن لاقاضـي ولالـي قضـيـه
حبيت اقول الله يجيرك مـن البـاس=واخفـف الآم الجـروح الخفـيـه
الصبر زين وتالي الصبـر نومـاس=واللي جرالـك قدجـرا العـام ليـه
بعض الأوادم عرفهم مثل الأمـواس=عجلٍ على قطـع الحبـال القويـه
في كل ديره لـه مـدور وعسـاس=وله كـل يـوم مغامـره عاطفيـه
كانك بوسط البحر سابح وغطـاس=ياما غدى وسط البحر مـن ضحيـه
ترا البحر غـدار والعـرق دسـاس= احذر تعلق بالغصون الطريه
لكن تركـد واخـذ الأيـام بقيـاس=لاتعيـد قصـة قيـس والعامريـه
اسلم وسلم عـد ماهـب نسنـاس=وماناحت الورقى بصبـح وعشيـه
العرض الشجري