هذي صـدودٍ منـك والا تغلـي

[الجـــــــــادل]

هذي صـدودٍ منـك والا تغلـي
والا تلاعب بالمشاعر والاحساس
والا جفـا والا عنـاد وتسـلـي
يفرح بها قلبك وتتعـذب النـاس
انطرك على مر المدى تتصل لي
وأبات اذ هجعوا المخاليق عسَاس
وأنطرك مع شمسٍ علينـا تطلـي
وأنطرك مع نجمات للبدر حرَاس
وأنطرك مع هبة هبـوبٍ تهلَـي
أو نسمةٍ دقت على الخافق أجراس
وان زادت أشواقي أهوجس وأظلي
من التوجد رابط القيـد بالـراس
هذا شعوري وأنت بالله قـل لـي
وش شعورك يم من صابه الياس
والله هذا عُشـر شوقـي لخلـي
واللي خفي ماينكتب فوق قرطاس