الشاعر الكبير محمد ابن الذيب

[الخيال الحر]

ياربعنا ياهـل السيـوف المحاديـد=اللـى عزاويكـم نهـار النكيفـه
في هاف مون أثر الحبـاري ملابيـد=ونتـوا مقانيصـه شمالـي عفيفـه
هاذا الكلام اومقصدي تلعة الجيـد=اللى سوالفهـا خفـاف اولطيفـه
صادتني ابعين تحيـر هـل الصيـد=اتقـول ابوزيـد الهلالـى وسيفـه
جتني تهـزع كنهـا ليلـة العيـد=اوكنها بنـت الشجـاع العفيفـه
تعلن إمارتهـا علـى جملـة الغيـد=وتقول ياهـون الامـور الكليفـه
يوم اقبلت جانى من الرهبـه ابريـد=قالت خليفه قلـت لبـى خليفـه
انا ولد عمه وهـو ماهـو ابعيـد=وان صرتي امعزب ابا صير ضيفـه
اسمي محمـد وان بغيتـي محيميـد=والحـب بلـوى والإراده ضعيفـه
قالت حشا ما ساجت الخيل للبيـد=متى المشاعـر تنقسـم بالنصيفـه
قلت احسبك شخصه وغيرك مقاريد=ياعارضه للحـب والقلـب ريفـه
قلت الهوى سيد(ن )وانا عبد للسيد=وان هبهب الغربي شعفنـي هفيفـه
يابنت انا مانـي بخلفـت أجاويـد=غير الهوى مثـل الجبـال المنيفـه
ياللى كفو لمداعـوات القواصيـد=انـا فقيـر الخبـز وانتـي رغيفـه
يأغلى من العقد المرضع على الجيـد=وآحلى من الراتـب بليـا وظيفـه
اذا حصلى وعد ضمـن المواعيـد=مـال الوليـف إلا معانـق وليفـه
لاشك قفت والغلا عـاده إيزيـد=لين املى شارع هـوى اورصيفـه
يوم ارحلت وردوفها امحق اعويـد=خبل إفعوله فـي الملاقـى عنيفـه
غرامهـا كثرعـلـى المناقـيـد=وحش علي اهـل المشاعـر لليفـه
من شان قررت لعيون ابـو زيـد=اصادمـه صدمـه لونهـا عنيفـه
يم الجـوازات وللحـوال تحديـد=سجت القدم لـو المسافـه كليفـه
جيت الموظف والبطاقه علـى إيـد=قلت اشطب امحمد ولسمى كثيفـه
اكتب خليفه بن خليفه ولا إتحيـد=عـاد الخليفـه للصبايـا خليفـه
قال السبب قلت العجب قالى عيـد=خبرته القصـه ونفسـي كسيفـه
قال الغلا قلـت الغـلا للمباليـد=قال الوفاء قلت الوفاء مـن يعيفـه
والحل قلت الحل مـن دون تريـد=الموت عز ولا حيـاة(ن) كسيفـه
أما اموت أبشرع الأحباب وآبيـد=ولا تسمينـي الحكومـه خليـفـه