قصه وقصيدة في مدح الرجال وذم اللاش

[راكان اليامي]

هذه قصه صارت على فالح بن مهمل السبرالعقص وهي قديمه يعني يمكن عام 1320 هـ والله العالم ومكانه مابين الحجاز ( وادي ارن ومهد الذهب والمويهيه ( كشب ) ومابين وادي الجرير اللي عند ضلع المضيح وفرده

الرجال ( اللي هو فالح ) معروف بين ربعه وكل من احتاج شي نصاه ولا يقصر مع احد وكل(ن) يعرفه من بعيد ومن قريب المهم كان جاره واحد من الجماعه اسمه نايض الموسمي (ابو واصل ) المهم قال يانايض انا ابغى اروح اجيب سفر العيال ( يعني طعام العيال يقصد اهلهم ) وانت اجلس عندهم لين ارجع قاله نايض انتبه يافالح ترى انت اذا جلست في مجلس ما تقوم وانت خابر معاورنا ( يعني اهلنا ) تخلي يذبحهم الجوع . مشى فالح على قعوده وهو حاله ردي ( ماهو سمين ) سرح من عندهم ومشى لين غابت عليه الشمس ويلقى له واحد من ربعه على الطريق اسمه مسحل العقص قال نبي نمرح عنده وبكره نواصل ( نمرح : ننام ) المهم يوم شافه مسحل قال لواحد من عياله قم قم قم الليله التيس (الله يعزكم) ما عنه الطريق يحيل ( يعني لا بد من ذبح التيس الليله ) قام الولد وراح للغنم اما مسحل جلس عند فالح وهو فرحان به وقعد يسولف معه لين جا وقت العشا يوم قلطوا عشاهم وليا هو جفر ( يعني تيس صغير ) ما هو اللي وصا ابنه عليه قال : التيس ليش ما ذبحته ؟ قال الولد : يايبه والله يومن اني قدت التيس ابا اذبحه انه طايح من الهري . يعني يقصد ان التيس ماهو سمين . المهم تعشوا وقعدوا يسولفون لين سرى الليل وامرحوا لين الصباح . قام فالح الجهمه ( قبل صلاة الفجر ) وسرح من عندهم يوم طلعت عليه الشمس قال القصيده هذي :

يالله ذكرتك ياعزيز الجلالي = ياخالق(ن) عبدك على كل مقدار
ويالله طلبتك قدم كل الحوالي = جنه ليا ضيعت فكري والابصار
وياما لبسنا من جداد الزوالي = وياما جلسنا للنشاما على النار
بّن(ن) يجوش جوف صفر الدلالي= وبهارها هيل (ن) وقرف(ن) ومسمار
وسقته على اللي في ايمني للموالي=ودرجت فنجاله بعدها على ايسار
وليا تقهووا وانسمح كل بالي = اوجيههم راحت تلفت بالانظار
ثم انحرفنا وانتقانا خيالي=ليا وجدته وان شريته من ا لجار
شريته بثنتين هاثم اسالي= ويقطعك ياهرج(ن) يجي ماله انوار
عز الله انه صدق والرب عالي= نشري فرود وقرن في حتن الاعسار
وياما ذبحنا من فروق(ن) توالي= دميها تدلج وتاليه قطار
لن نوخن مساوجات الحبالي=ولفا عليهم من حدا الربع سيار
والناشي اللي ما نشا باشتغالي = عافيه ياناثر على القرن الاثمار
خليه يعقم ما نبا له عيالي=لعل ما يدرج طناهم على النار
ان كان لا طيب ولا هو بغالي= مشيه مع اهل الطيب يا فلان معوار
يوم الشكاله شيعة(ن) للرجالي = هوه مقابلها على موتة النار
مغار قاعد عند زين الدلالي = وهيه تلفت يم جاره للاسوار
عساه من تحت السقايف يشالي = يسقف عليه القبر ماواه للنار
يومن ابو واصل عليه يلالي = يقول ماسديت خلوه مغوار
وحنا نسد الدرب والدار خالي=ياما قطعنا من بعيدات الاودار
نوب(ن) معي خويا ونوب(ن) لحالي= والرزق عند الله منشي بالامطار
واليوم كني من خبول الدبالي =عز الله ان القل شر(ن) بالاشرار
والشوف عود مايحق الغزالي= وجدي على شوف(ن) ليا وقت مسبار
اذني افسح ضميري وبالي= امشي مع الديره على حق الانظار

وسلامتكم

[العماني]

لاهنت اخوي ريكان على القصة والقصيدة وتسلم يا شيبة المنتدى.

تقبل تحياتي،،،

[راكان اليامي]

هلا وغلا يابومبارك
ولاني شيبه المنتدى توني شباب ياخوي

[العــرجاني]

لا هنت يالذيب قصة رائعة وأبيات أروع
صح لسانك ولسان الشاعر



اخيك العــــرجاااااااااني

[عـزام]

لا هنت يا راكان على السالفه الطيبه وابياتها


الولهان

[راكان اليامي]

اررررررررررحب يالعرجاني وولا انت يالغالي

وتسلم على الرد

[راكان اليامي]

اررررررررحب يالولهان
وولا انت يالغالي

[سمو الامير]

لاهنت ياراكان على السالفه والقصيده

[راكان اليامي]

ولا انت ياسمو الامير

[حبيب]

راكان لاهنت على القصة والقصيده

تحياتي