حيـــــــاك يـــا مجاهـــــد

[حكاية شمس]

السلام عليكم والرحمه والاكرام

واسعد الله صباحكم ولياليكم ..


سؤال صارله فتره يطري بخاطري واحدث نفسي عنه ،

متى يحق للمرئ انه يجاهد ..؟

وهل له زمن معين وقت محدد ممكن انه يرد بعدها ويقول انا سويت اللي علي
واخلي المجال لغيري يكملون المشوار!

تدرون اللي خلاني اكتب اليوم عن الجهاد
هالعوايل اللي وراهم واللي مو محصلين لا أرض ولا سما

اليوم في المدرسه تعرفت على 3 طالبات

وكنت اشوفهم واستغرب من طريقه لبسهم
وخاصه ان في توأم بينهم ووحده من التوائم تعاني من صعوبات تعلم
تخلي البنات يعاملونها معامله خاصه

لما قعدت اسأل عنهم اكتشفت انهم من عايله معروفه في الديره
ولكن
طلع الاب مزواج وله يمكن من الذريه الكثير ومالمهم ولا جمعهم في بيت واحد

الا كل مره وعيالها عايشين عند الخوال
وهم متكفلين فيهم
ولما احتجنا له في الوزاره قال شنو
قال بناتي ماله داعي يتعلمون خل يقعدون في البيت مع ان اعمارهم بين 7-12 سنه
وعند الاستدعاء له رفض الحضور
وللاسف الام ماتقدر اتسوي شي ولا تحل وتربط علشان مو كويتيه ولا عندها وصايه تعليميه او حضانه خاصه بالبنات
لان الاب رافض
وفعلا هذا اللي صار
قعدوا البنات في البيت ماعدا وحده فيهم لان مدرستها يقدر الخال يوصلها لها واهو رايح الدوام
او تروح المدرسه مشي الصبح وترد هم مشي
تخيلوا بنت بالابتدائي من قطعه لي قطعه تروح المدرسه مشي ..!
اما البنت اللي تعاني من صعوبات تعلم
تحتاج اداوم في المدارس الخاصه واهي بعيده عن مكان سكنهم
فتم الغاء مستقبلها وأهي بالمرحله الابتدائية
لان الخال والام مايقدرون يسوون الاوراق وماباليد حيله

وزياده من الخير خيرين ان
هالاسر بعد اتعيش على مده عيال الحلال لهم
وين معاش الابو من الحكومه يقولون يجي وياخذ معاشه ويصرفه على نفسه هناك
مادري اي اللي ابدا العيال وجهادي فيهم وتكبيرهم وتنفيع المجتمع منهم والا اني اجاهد بحرب خسرانه من سنين
نسى هالمجاهد ان ربي بيحاسبه على عياله وكيف رباهم وشنو اعطاهم

نسى اللي راح يعلي رايه الاسلام في افغانستان ان الرسول صلى الله عليه وسلم قال :

((كلكم راع وكلكم مسؤول عن رعيته،
فالإمام راع ومسؤول عن رعيته،
والرجل راع في أهله ومسؤول عن رعيته،
والمرأة راعية في بيت زوجها ومسؤولة عن رعيتها،
والولد راع في مال أبيه ومسؤول عن رعيته،
والخادم راع في مال سيده ومسؤول عن رعيته،
وكلكم راع وكلكم مسؤول عن رعيته)).



و عن عبد الله بن عمرو بن العاص رضي الله عنه وأرضاه،
أن رجلاً جاء إلى النبي صلى الله عليه وسلم يستأذنه في الجهاد
-يريد أن يخرج إلى الجهاد في سبيل الله-
فقال له النبي صلى الله عليه وسلم:
{أحيٌ والداك؟ قال: نعم قال: ففيهما فجاهد}.
فرده النبي صلى الله عليه وسلم عن الخروج إلى الغزو والجهاد؛

وأظن اننا نقدر نقيس هالحديث على الابناء

في النهايه يحتاج المجاهد وقفه مع النفس والخلوه للتفكير في اهله وابنائه
قبل لا انه يقرر هالقرار اللي يأثر عليه وعلى اهله وابنائه .

ولكم اجمل تحيه وسلام من الشمس وحكايتها