ياحزام وين اللي غيابه تبلاني = وينه غدا ياحزام له فوق شهريني
ياخوك انا من يوم ماغاب مرضاني = حتى الدكاتر مابهم 0 من يداويني
ياحزام لو بضحك بغطـّي على احزاني = اضحك وحزني بالخفا باطش ٍ فيني
اخفيت حزني من تباشير عدواني = اللي يسوقون التباشير عجليني
ياحزام تكفى شبت الكبد نيراني = وانا تصبـّر وآتعوّذ شياطيني
عجـّـل علي ياخوك في نجل الاعياني = دوّر عليه وبلّغه كان ناسيني
قلّه مهو حق ٍ يجافي وينساني = وينهي بلحظه كلّ مابينه وبيني
قلّه ترى الهجران من غير برهاني = داء ٍ عديم ادواه بين المحبيني
قلّه تراني ساهر الليل وحداني = وعيني على الجوّال 0 لايتصل فيني
ياحزام قلّه كل هرج ٍ تقفـّاني = وهرج القفى سم ٍ سرا في شراييني
وياحزام قلّه سكـّرت كل بيباني = ماقوا تحمـّل صدمة ٍ ثانيه فيني
ياخوك مابي حيل من يوم جافاني = الحيل دوبه بالخطاوي يقدّيني
ويله من الله يوم دمع الحزن باني = متكسـّر العبره والاجواد ممسيني
ليته ذكرني ساعة ٍ ماتناساني = علّ وعسا قلبه يروف ويحاتيني
ليته فهمني ماتجاهل وخــّلاني = ماصار هاللي صار لو كان موحيني
لاشك راح وماهناله وراضاني = الله عليه اكبر كذا مايراعيني
ماكننا عشنا المحبه بصدقاني = وماكنـّها شبكت اياديه بيديني
لاكن عسا ماهو معا واحد ٍ ثاني = وانا على رجواه ومضيّع سنيني
كانه لغيري ترف الاقدام عشقاني = الله يرحم حالتي من عذابيني
ياحزام دوّرله ترى الوضع تعباني = وان كان وافيته فـ خلّـه يوافيني
قلّـه يقول ســـعــود ياعود ريحاني = طيفك بعد ماغبت 0 ماغاب عن عيني
وقلّه ترى التذكار عندي بحفضاني = تذكاره اللي لانظرته يهـّديني
شريطة ٍ متلوّنه بأربع اللواني = خذيتها تذكار منـّه0 لها حيني
وقلّه ترى جريت به حزن الالحاني = يوم الحمام بجرّ حزنه يجاريني
وهلّ رمضان وعيّد الخلق ماجاني = خوفي يطول الصد والصد يشقيني
احترت من صده ومن شحّ الازماني = وازعجني الهاجوس والهمّ طاويني
انشهد ان الحب غادر وخوّاني = وانشهد اللي فيه حبوا 0 مجانيني
واللي مشابه صار من غير عنواني = ياكثر مجهوليه مامن عناويني
وسلامتكم
الشاعر / سعود رتيبان الجويّر
11-11-2005, 09:42 AM
العرض العادي
