((يوميات عفراء وغزيل))

[gravity]

هذه القصه قصه عائله صغيره مكونه من الاب (طرجم) والأم (مزنه) والابن الاكبر (محسن) 21سنه والابن الاصغر(سويلم)5 سنوات والبنت الكبرى (عفرا) 18سنه والبنت الصغرى(غزيل)15سنه. ويعيشون في قريه صغيره(هجره)
وعندهم حلالهم (ابل ؛ غنم ).

بدايه القصه:

يعود الاب بعد مكان عند البل في البر القريب من هجرتهم ويدخل البيت

الاب: السلام عليكم

سويلم اول مايشوف يناغز متجه صوب ابيه ويقول: ابي جا ابي جا ابي جا ويتلوى على ابيه
الاب : يصكه ذاك المخمس لينه يفتر هناك

سويلم: يطنب بالصياح يمااااه يمااااه ابي ضربني
الام: تستاهل انك قذا
الام :الله حي ابو محسن
الاب : مايرد عليها ويقول اغرفو الغدا عجلو علي وراي شغل عقب المقيال
يدخل الاب الى الدوانيه وينادي على محسن الي منسدح في المقلط
الاب: يامحيسن يامحيسن
محسن: يالبيه يالبيه جاك جاك
ويدخل على ابيه في الدوانيه
محسن : سم يبه
الاب: انت ذا ويش انا موصيك عليه البارحه ماني بقايلك تمر راعي الغنم.
محسن: سجيت يبه
الاب: جعلك السجه واللجه . قم رح جب الغدا
ينطلق محسن ماكنه سلم.
وياتي سويلم ويطل على ابيه ويقول
سويلم: يبه ماعليه اتغدا معكم.
الاب: ياويه . ليه ماتغدا معنا وانت مره
سويلم: لايبه خافك معصب علي
الاب: لا ماعليه تعال وخلك رجال عاقل.

الوكاد تغدو وراح الشايب يقيل ومحسن انسرق وطلع برا يعمرها
(دق زقاره)

المشهد الثاني:
الصاله...

غزيل: يماااه يمااه شوفي عفيرا تجود شعري وتجره قطعت غريزاتي
الام: عفرا عفرا ووجع شقومش على اخيتش جعلش البلا.
عفرا تطلع من غرفتها وتقول: يايمه دبلت كبدي وصجتني معاد خلتني اسمع قصيده محمد بن الذيب واحفظها علشان اسمع خوياتي في المدرسه...
الام: ابكيش يالخبل تضربين اخيتش علشان قصيده تدرين شقومش قومش يومش مالش والي يسنعش

عفرا: تضحك وتقول وانتي وين رحتي يامي العزيزه وتقرب من امها وتحب راسها (مهوب لله) وتقول يايمه على طاري المدرسه انا ابغي اروح انا وياش صوب سوق الاثنين بكره وابغي اشتري عباه غير عباتي ذي.
الام: وعباتش شقومها مافيها الا الزين.
عفرا: يايمه عباتي امس وانا راجعه من المدرسه تعلقت في شبك ابو عقيده وشقها ومستحيه زيد اروح بها للمدرسه.
الام: خلاص اخذي عباتي وروحي بها وانا باخذ عباتش.
عفرا: لا والله عباتش حقت عجايز تبغين تفضحيني في خوياتي.
الام: هجل مابه الا ذا...(وتسوي حركه بيدها)
عفرا: امحق ليل يايمه هجل معادني برايحه للمدرسه.
الام: ابركها من ساعه بالطقاق
وتدخل على خط المحادثه غزيل وتقول:
غزيل: الا يمه فديت كبدش بطلبش طلب وتكفين لاترديني
الام: ويش عندش انتي بعد يالثانيه
غزيل:نبغي نروح عرس ال فلان بطيح كبدي انكاني مارحت
الام: ياويلي ويلاه وانتي تهقين ابيش بيوافق انا والله اللي ودي اروح واستانس مهوب انتي.
ويدخل في هذه اللحظه محسن بعد ماخلص تعميره...
عفرا اول ماشافته كنها شايفه ابليس وتقول: فلا هلا
محسن: يخزها ذيك الخزه اللي ميعتها في مكانها ويروح صوب المقلط...

انا عجزت وانا اكتب

ولكم التكمله بعد فتره اذا شفت منكم تشجيع بكمل باقي القصه


تحياتي السولعيـــــــــــــه

[عـزام]

ههههههههههههههههههههههه

يا السولعيه


يا حى ذا العين من ذا الحكى

طلعتى لنا مصطلحات فقدناها من مبطى ما نسمعها الا من الشيبان والعجايز

بصراحه ابداع و قصه اكثر من رائعه يا السولعيه

لاهنتى و بانتظار تكملة القصه

[ناصر بن فالح]

ههههههههههههههههههههههههههههههههه

كملي كملي احس فيه كلمات قلتيها أنقرضت

بانتظار باقي القصه

[gravity]

اررررحب يا عزاااام

ابشر بسعدك بس بجيب كلمات من الارشيف وارجع اكمل لكم القصه

لا تحرمنا من مرورك

سع سع

[gravity]

هلابك يا الفيلسوف منور مشاركتي

وانشاء الله بدايه القصه اعجبك

وانتظر المزيد عن قريب


سع سع

[الشقحه]

ههههههههههههههههههههههه جعلش الغضر


الا وشهي الحركه اللي سوتها الام بيدها


ارسميها كروكي


تحياتي لش وتراني متابعه الموضوع بشوف اخرتها هم راحوا للعرس والا لاااا ؟؟

[gravity]

ههههههههههههههههههههه لاتدعين علي بالغضر وجع ههههههههههه يومتي منش يعنني ما اعرف الحركه بعدين لا شفتش بوريش ^_^

ابشري يا قلبي بكملها عن قريب انشااء الله اعذروني يمكن اطول شوي ..


الســـــولعّيه

[(_. ._)]

ههههههه موضوع حلو

بس ترى قويه بنات الوادي
لو العنوان غير كذا يكون احسن

[gravity]

هلابك يا مجاريح كانه مضايقك العنوان بغيره


رضا الجميع يهمني .. ولاهنت على مرورك وانشاء الله اعجبتك القصه وانتظر التكمله


السولعيه

[(_. ._)]

ننتظر التكمله
ولاهنتي