( عيال الرّعاه ) .!

[لبى كبدك]

صح لسانك يبن عصيدان ورائع كالعاده / لبى كبدك

[محمد بن صويان]

الغالي
ابن عصيدان
مبدع حتي النخااااااع وشهادتي فيك تقطر دم
صح السانك تريليون مرة
ودمت مبدعاُ

[احمد بن جوفآن]

الله الله

صح لسانك يابن عصيدان ..

.. ولاهنت على ذالجزله يالشاعر

.. ولاتحرمنا من جديدك يالاميـر ..

[راعي الباكور]

صح لسانك يافهيد

والله انك مبدع وجزل

لاهنت

[نـاصـر]

حجز ولي عوده

[سعد بن سريّع]

المشاركة الأصلية كتبت بواسطة فهيد بن عصيدان

صباح الخير .,

اقبلوها واعذروها .!

لاعاد تنشد ويش حال فهيد , يامال الغناه=الأسئله معروفه , ومردودها .؟ مردودها
بعض النشايد توجع الرجّال , وتبيّح خفاه=ودّه بفرقا الناس لمفارق كُثر منشودها
ماكلّ برقٍ يجذب المسني ليامنّه رعاه=مدام مالِحْق المطر فبروقها ورعودها
والبارحه , ليله مهيب تعدّ من ضمن الحياه=لوانّه ايكاشف علي نور القمر .؟ ياسودها
أغبط خليّات القلوب اللّي لو اتحصّل لهاه .؟=اتسجّ في جرّة ربابتها , ورنّة عودها .!
وانا لي الله قلبي البارح شعاه اللّي شعاه=يطمر معاليقي من أصغرها , وياصل عودها
أمتّر ( الجهرا ) وساقي من خلاه وفي خلاه=ماكنّه الا في مطالعها .؟ يحرْس حدودها
خابر لي اطلالٍ لوقتٍ راح وأعطاني قفاه=يابري حالي , يوم أمسّيها وذعذع نودها
والنوم , مالنّوم درْب لعيني ولاله طراه=ودموعها ياهونها , ومْن اوّلٍ ياكودها .!
الضيقه انتشرت , ويومي من صباحه لامساه .؟=ماغير اذاودها عن الصّدْر وعجزت اذودها
ماكنّها الا ضيفٍ , ايضيق المعزّب لالفاه=ضافت معاليقي , وهيّت لإجتماع إوفودها
أسبابها , سرّ إجتماع أهل المشالح والعباه=اللّي يِحَفْظ سدودها , والا يبيح سدودها
والكلمه اللّي زتّها لساني على اطراف الشّفاه=نطقتها , وانا اعرف انّي ماجهلت بنودها
للصّاحب اللي يوم اوصيه , اجتنب درب الوصاه=ولامشى فيها وورّدها بغير اعدودها
صحيح مايمديني أغليه , ويشرّهني غلاه=لكنْه ماأدى الامانه , والعهود اعهودها
وانا بشر يخطي .! وكلٍّ عارفٍ وشهو خطاه=لكنّ ذيك الساعه ان عادت .؟ فأنا بعودها
أجابه أيامي , واواجهها على كلّ اتجاه=واحاول انفذ من قذايفها , ومن بارودها
أتبع هوى نفسي ياعنكْ انّه يعنّيني هواه=ونفسي على درب الهلاك تقودني وآقودها
وسنيني تمرّ , ونصيبي في سنيني .؟ ماخزاه=والله مدري وش حصيل اصدورها وورودها
وأحلامي تموت , وطموحي يحتضر فأوّل صباه=تعبت من كثرة خسايرها , وقلّة فودها
وإن جيت بطردها .؟ سبوق الوقت , مايمدي مداه=ولاصدق قول المثل : ملحوقها مطرودها
والوقت لايِحمد , ولايمّن , ولاينصف قِضاه=ناسٍ مايعرفها , وناسٍ يعترف بوْجودها
أحدٍ يِبعّد , لوّه أقرب : منسب ووجه ووجاه=وأحدٍ يِقرّب لجل زين : اللّي تكدّ جعودها
وقتٍ على عْيال الشيوخ , ايقدّم عْيال الرّعاه=لوانّها ماكبّرت ضيّانها ووقودها
ودنياً , تزيّن لي بملبوسٍ يشدّ الانتباه=تغريني , وتكشف مفاتنها , وليّن عودها
أطرد وراها , وإن دعتْ .؟ لبّيتها ماقلت ( هاه )=وأطبق شفاياي بشفاياها , وأضمّ زنودها
ومن قبْل لاتاصل مع العاشق لذروة مشتهاه .؟=تنفر , ولاتاتي وتِلْحِق بالصدود .؟ اجحودها .!
فالمبتلا .؟ يصْبر مدام إنْ : في بلاه الله بلاه=ولايلدّ بهرج حسّاده , وغلّ إكبودها
ولايشحّ بدعوة الله , دامه أقرب في دْعاه=ويناجي الله فالصلاه , رْكوعها وسْجودها
والرجلْ دامه حيّ .؟ ياقف دون ذكره ويحماه=والا الرخوم ارخوم , لوذكْرت بطيب إجدودها .!
ماتلحقه في نفسه مْن الناس شكّه وإشتباه=إيعرف ويش أهدافه , ويتعب على مقصودها
إيدوّر اللّي يرفعه , ولاينزّل مستواه=ويدرى مشاريه الرّجال , ويحْسب لمنقودها
وأنا هنيّا , يامنقّلة العلوم امن الرواه=وإن كبْرت القاله .؟ تراني قدّها وإقدودها
أطقّها فالوجْه , وأضرب فالخشوم وفالجباه=إلين أميّز بين صاملها , وبين شْرودها .!

تحفـــــه بالجــــزاله


دمت بخير

الغناوي

[حـــوران]

وأنـا هنيّـا , يامنقّلـة العلـوم امـن الـرواه=وإن كبْرت القالـه .؟ ترانـي قدّهـا وإقدودهـا
أطقّها فالوجْـه , وأضـرب فالخشـوم وفالجبـاه=إلين أميّز بيـن صاملهـا , وبيـن شْرودهـا .!

كفوووو كفووو ياأبو محمـد






والقصيـده هذي غير بكل ماتحمل من معنى , قصيده شيخه ولاتطلع إلا من الشيوخ مثلك

وعزالله إنـك أبدعت ورصعتها وجملتها , وصح لســانك عدد ماكررت أبيـاتك

واشبعت ذوائقنا بالجزله اللي ماكل شاعر يجيب مثلها , لكنها منك تكرر

قريتها من قبل وحفظتها في جهازي وقريتها الحين واستمتعت فيها بعد

لله درك يافهيـد

[محمد بن دسمه]

ارحب ارحب يابومحمد

لله درك ..

صح الله لسانك ولاهنت

والله اني قاريها 3 مرات

بانتظار المذهل

[الــشــآمــخ]

اللــه اللـــه ..

صح لسانك واعتلى شانكـ .. يا فهيــد ...

(( ابدآآآآع ))

[نمران]

والبارحه , ليله مهيب تعدّ مـن ضمـن الحيـاه
لوانّه ايكاشف علـي نـور القمـر .؟ ياسودهـا
أغبط خليّات القلوب اللّي لـو اتحصّـل لهـاه .؟
اتسجّ فـي جـرّة ربابتهـا , ورنّـة عودهـا .!


لله درك ..


وقتٍ على عْيال الشيوخ , ايقدّم عْيـال الرّعـاه
لوانّـهـا ماكـبّـرت ضيّانـهـا ووقـودهــا


عز الله انك ماقلت الا الصحيح


وأنـا هنيّـا , يامنقّلـة العلـوم امـن الـرواه
وإن كبْرت القالـه .؟ ترانـي قدّهـا وإقدودهـا
أطقّها فالوجْـه , وأضـرب فالخشـوم وفالجبـاه
إلين أميّز بيـن صاملهـا , وبيـن شْرودهـا .!


كفو كفو ..

ابومحمد صح لسانك وبيض الله وجهك
وشهادتي فيما تكتب يقطر دمها
تقبل مروري