تداحمني هواجيسي وانا اعرف حزة الهوجاس=ليا من طرف المسرى تداحم في شرايني
تسريني واسريها واصادم راسها بالراس=على راسي تهب النود وترقص لي شياطيني
اعوم ابها بغبات البحور وللبحر غطاس =اخوض ابها ولو ان البحر موجه يغطيني
بنات الفكر اروضها والبسها جديد اٍلباس=واحوف في طوارفها وابعد عنها الشيني
اكرمها واحشمها واعديها كلام الناس=لحيث الناس تفهم فالسلوم وفالقوانيني
يقولون الرجال البيت مايبنى بليا ساس=وانا بتعب على ساسه لحيث انه يذريني
على اللي من ثمان ا شهور بعده جاب لي وسواس=لطيف الروح ماغيره لياجيته يسليني
هذاك اللي حمس كبدي كما بن ٍ على محماس=عليه القلب يكفخ مثل طير ٍ بالجناحيني
ثمان اشهور اعيش ابها وانا بين الرجا والياس=اعيش ابها واشوف الهم والحيره تباريني
سبايب حكي عذال ٍ خبيثين الطبوع انجاس=على غره سعو كل ٍ معه خنجر وسكيني
تهيو للمحبه يهدمون اركونها بالفاس=رديين الفعايل مالهم مبدأ ولاديني
تسببو بفرقى وليف ٍ ماوطى الادناس=على وضح النقى المجرود الاقيه ويلاقيني
شريف ٍ هو عفيف ٍ فالشرف ماقاسه المقياس=عذاب الروح حالو به هله عني محيليني
وشدو ياحمد ولاهم فالرقه ولا الفنطاس=بعيدٍ ياحمد عنا وفالمرواح عجليني
تنحو كنهم ريح ٍ يصلفق له ورق قرطاس=وانا من يوم شدو ساهر ٍ والناس ممسيني
اكن الضيق في صدري ويكتمني بضيق انفاس= واكنه واتنهد غصب وتنزل دمعة العيني
يفز القلب لامنه طرى واعيف انا المجلاس=اعيفه واتصدد ما ابغي العدوان توحيني
وانا اللي كني التاجر خسر ثم اعلن الافلاس=خسر ماتملك ايدينه من ابيوت وملاييني
وانا اللي ذقت لوع البعد والحرمان جوف الكاس=وانا اللي من بعد خلي كثير ٍ مايبكيني
وانا المجروح من بعده وانا الهايم وانا المحتاس=وانا اللي لو عطيت ابها ديار ٍ ماتكفيني
ابي شوفه وابي قربه وابي بصادق الاحساس=ابيه بصادق احساسي لحيثه ساكن ٍ فيني
يصور لي بخيالي صورته لاهب لي نسناس =ويطري لي تعزال القضي يسار و يميني
وانا ياكيف ابنسى من خدوده يقبس ٍ اقباس= حرام اني فلا انسى لو نسى المسلم فلسطيني
سقاك الله ياقتٍ مضى مغصونك بيباس=مضاليبك ليال ٍ ماغبطت ابها السلاطيني
وانا والله يالو لا الحيا والعرف والنوماس=وسلم ٍ من قديم ابي على مسكه موصيني
لاجيه في بيته ولو حالو من دونه الحراس =لا اخمه وابتعد به لو نعيش العمر جاليني
ولاكني عليه اخشى من المنقود والبلاس =اخاف اهل النمايم لاتقفاه وتقفيني
عسى ربي يجازيهم نهار ٍ تقرع الاجراس =عساهم فالجحيم اللي سعو مابينه وبيني
صحيح ٍ مايحس بالجمره الا اللي عليها داس =وانا اللي واطي ٍ لي جمرت ٍ بالرجل تكويني
وســــــــــــــلامـتكم
04-01-2006, 02:51 AM
العرض العادي
