قصيدة رائعة للشاعرة الغالية العامرية
يا زين وقتن فات ما هوب هالحين=يــوم الـنـوايـا كـلـهـن صافـيـاتـي
و الحقد ما يوجـد و دايـم سعيديـن=ونفوسـنـا سمـحـة وسـكـر نبـاتـي
و بيوتنـا ونسـه و لا بـه شياطيـن=مـا يدخـلـه صــورة ولا منكـراتـي
و يطرد ظلام الليـل عنـا سراجيـن=و أحيـان يقضـي قازهـن طافياتـي
مشروبنا صافي من الزيـر ولبيـن=ماهـوب مستـورد سريـع الفواتـي
ما صنعوه الغـرب يـا فالهـم شيـن=مابـه مـواد الحفـظ و مسرطنـاتـي
وعشينـا مرقـوق بيـن العشـاويـن=تحطـه أمـي قبـل وقــت الصـلاتـي
لقمـة هنـيـه طيـبـه طعمـهـا زيــن=تحـوفـهـا بيـديـنـهـا الـطـاهـراتـي
ثمـن نـنـام إلــى قضيـنـا مصلـيـن=بعـد العشـاء كـلـن يـريـد المبـاتـي
و أمـي تنومنـا بـزيـن السباحـيـن=سوالـفـن مـــن عـنـدهـا طيـبـاتـي
ننام من بدري ونصحـى نشيطيـن=بعـد الشـروق أشغالـنـا جاهـزاتـي
مـا بـه كسـل لأشغالـنـا مستعـديـن=مـا عنـدنـا سـايـق و لا خادمـاتـي
نلبس بيوم العيـد ثـوب السباهيـن=و أم تحنـيـنـا نــمــاري الـبـنـاتـي
مقيـالـنـا بمجـبـبـن بـيــن بـابـيـن=فيه الهواء يطرق جميـع الجهاتـي
نشـب نــارن بالشـتـاء و متدفـيـن=مـــا فـيــه دفـايــات و مكـيـفـاتـي
يجـي المطـر و ثيابنـا تنتلـي طيـن=و نلعـب جميـع عيالـنـا و البنـاتـي
يصـب مثعبنـا ونمـلـى المواعـيـن=يا حلو ذاك المـاء و ذيـك الحياتـي
ماهي حياة الحين ياشيـن هالحيـن=كـلـه غـثـاء وهمـومـنـا كـاثـراتـي
كلـش يجـي لـك لـو بكلمـه تناديـن=كـلـش تـوفـر بــس مـابـه حـلاتـي
صـلاة ربـي عـد مـا تـرفـع يـديـن=علـى محمـد صـاحـب المعجـزاتـي
06-12-2007, 11:25 PM
يا زين وقت فات
العرض المتطور
