همــهـــمــات سعد . . !

[سعد الصميل]

اكيد سمعتوا عن سالفة لحم الحمير ( اعزكم الله ) . . صايدينها في احد ارقى المطاعم بالكويت . . وطبعا مايجري على الكويت . . شي طبيعي يجري على السعوديه بعد اكتشاف ان وجبات اللحم على الخطوط السعوديه تعطي الركاب لحم حمير . . لأن الديرتين . . اهل وكل مايجي للاولى يجي للثانيه . . بحكم الأخوه والمصير المشترك . .



يعني مافيه دولة تشوف اهل الديره الثانيه ياكلون لحم الحمير . . وتخلي شعبها ماياكل مثل الشعب الشقيق !!


طيب . . خلونا في الواقع بدون مانسب ونلعن . . .

المطعم الشهير . . الكل كان يمدح المشويات عنده قبل السالفه . . والخطوط السعوديه . . ناس واجد يمدحون كبسة اللحم عندها . .

يعني البلا مو في اللي يقدم لحم الحمير . . البلا في بطونكم بلا في بطونكم . . تاكلون لحم الحمار وتتلذذون فيه . . وتبدعون فيه وتحطون الصوص والنكهات وتستمتعون بالطعم الاصيل . .

صحيح انك اصيل يا حمار . . يكدونك وينكتون عليك ويسبونك وياكلون لحمك بكل شهيه . . وبعدين يسبونك مره ثانيه !!

لا وفيه معلومه جديده سمعتها بالاذاعه . . فريق طبي يقول ان حليب الحمير مفيد لتأخير الشيخوخه . . وللبشره . . والحساسيه . . والجمال والنظاره . . . . الخ !!

استغفر الله . . والله يبعدنا من لحمها وحليبها . .

خلونا بوجبات لحم الحمير . .

شنو توقعون المنيو الجديد بالمطاعم بالكويت ؟

انا عن نفسي اتوقع . .

حمار مشوي - حمار مقلي - مرقة حمار . . .


وبالمطاعم الايرانيه . . كباب حمار . .

والهنديه كاري الحمير . .


بس اتوقع اللي راح يدخل المنافسه بقوة مطاعم المندي . .

مندي حمار . . مظبي حمار . . مضغوط حمار . .

المهم بقى عندي سؤال بما انكم بالتأكيد كليتو عند المطاعم المضبوطه في لحم الحمير او كليتو وجبة بالخطوط السعوديه . . منو فيكم ما أكل ولا جرب لحم الحمار ؟

سؤال عكس السير سابقا . . واقعي حاليا !!

[سعد الصميل]

(1)

من الامور اللي ماهي راضيه تنقرض أبداً أبداً . . .

الكتابات على الجدران وفي دورات المياه العامه الله يعزكم . .

في دول الغرب فيه ناس يشخبطون . . لكن شخابيطهم تفتح النفس . . ودك انهم يمشون ويشخبطون !!

مستوصف الفحيحيل على مدخل المنطقه . . وكان جداره اللي على الشارع كبير . . ومغري جداً للمخربين !!

من يوم حنا مراهقين وهو ينكتب عليه عبارات واجد ومنها مثلا . . ولاية آل فلان . .

وكان المستوصف كل فتره يصبغ الطوفه علشان يشيلون التخريب . . ونفس الحاله . . يرجع ويكتب . . ولاية آل فلان !!

المهم . . قلنا يمكن يكبر ويعقل . .

لكن الغريب في الأمر . . ان الحين وبعد 15 سنه تقريبا . . لحد الآن المستوصف يصبغ ويجدد . . ويرجع يكتب ولاية بني آل فلان !!

مدري . . هل هو نفسه اهبل ولحد الآن ماكبر عقله ؟

او انه خلى الموضوع وراثه عند واحد من عياله . . . ما ادري !!

الحلو بالسالفه . . ان المستوصف مره يوم ضاقت فيهم الدنيا شافوه يكتب بصبغ اخضر راحو صبغوا الطوفه اخضر غامق علشان ماعاد يبين الصبغ . . .

كان الحل عنده بسيط . . بدل صبغ الرش بلون أسود . . واستمر المسلسل !!


(2)

اول يوم بالوظيفه . . سألت وين دورة المياه ( اعزكم الله ) . . دلوني ورحت لها . .

اول ماجلست فيه . . لقيت مكتوب على الباب بخط صغير . . ( انظر يمين ) . . التفت يمين لقيته كاتب ( انظر يسار ) . . التفت يسار لقيته كاتب ( انظر خلفك ) . . قعدت اضحك قلت وش ذالعبيط !!

شفت وراي . . لقيته كاتب ( عليك واحد يالمخفه ! ( . . ) وانت ساكت ) !!

انا شفت ناس عبيطه . . بس مثل الاهبل هذا ماعمري شفت . . متفرغ وكاتب القصه هذي بالحمام !! والله فاضي

[سعد الصميل]

فيه جنسية عربيه معروفه للجميع بشهرتها . . . بالنصب !!

مايحتاج اقولها . . اعتقد الجميع يعرفها بدون حتى تفكير !!

انا شخصيا كنت اشوف ان اهل البلد المقصود انصب ماخلق ربي . . لكن بعد ماجربت التعامل مع الافغان . . رحمت الرجاله اللي كنت ظالمهم بالنصب !!

قبل شهر ونص تقريبا . . دعمت على سيارتي . . والحمدلله على سلامتي . . ومحد فيكم درا عني . . لكن لنا الله . .

المهم . . بعد الحادث بكم يوم بديت بتصليح السياره . . فـ نصحوني الشباب بالسكراب بالجهراء . . رحت للسكراب وسجلت القطع المطلوبه . .

المهم ان فيه قطعه بعد الخصم والخناق مع الافغاني عطاني اياها بـ 70 دينار . . وهي مستعمله طبعا وحالتها مقبوله ماهي ممتازه !!

رحت للي جنبه . . افغاني ثاني طبعا !! ( اكتشفت انهم مسيطرين على السكراب ) . . وخذيت قطعه ثانيه . . قيمتها برضو 70 . . طبعا احلى شي تسمع الافغاني شلون ينطق الرقم . . صَبعيين بالصاد !!

ورحت للثالث الافغاني كالمعتاد . . وقطعه ثالثه بـ 130 . .

ورابع من نفس الفصيله النصابه . . وقطعه رابعه بـ 25 . .

بعدها وانا راجع اكتشفت ان القطع بالوكاله ارخص من الحراميه وهي جديده وبالكرتون ومن الوكيل الاصلي . . يعني الحاجه اللي بـ صبعين . . بالوكاله بـ 48 !!

صار فلم اكشن على مارجعت الاغراض وخذيت فلوسي وتعاملت مع الوكاله . . والقطع توصلني وانا جالس بالتكييف واشرب شاهي وماء بارد . . بلا التعامل مع شلة حراميه . .

احلى مافيهم غيروا نظرتي . . وخلوني احترم شعب الثوره لأنهم طلعوا أبرياء بالنسبه لهم !

[سعد الصميل]

استغفر الله العظيم , استغفر الله واتوب اليه . . . اذا وصلك البرودكاست هذا ارسله لـ القائمه كلها . . وبتسمع خبر سعيد الليله . . !!

هذا الدعاء اذا ارسلته ستحصل على 500 مليار حسنه و54 مليون !!

واذا ما ارسلت البرود كاست هذا . . الذنب برقبتك ليوم القيامه !! لا يحوشك !!

و ياويلك بعد بيجيك العوّا وحمارة القايله !!

ناس ماعندها شغل اللي يطلعون الرسايل هذي . . والمشكله مو فيهم والله . .


المشكله باللي يصدق المسكين ويرسل يومه كله راح وهو يقرا ويرسل وخايف لا يقعد الذنب برقبته ليوم الدين !!


كل ما اقول اننا تطورنا وعقولنا تنورت . . ويجيني مسج من النوعيه اللي كذا . . انحرج من نفسي انا . . !!


منها اللي مسوين فيها ملائكه ويحسبون حسناتك وصايرين لي محاسبين حسنات !!

ومنها اللي يرسل لك اي شي يوصله بدون مايتأكد . . يعني اعرف واحد من الشباب يرسل لي مرات احاديث اشك فيها واللي يخليني اتأكد انها رايحه فيها القى مكتوب علي بن ابي طالب عليه السلام , اذا قريت عليه السلام بدال رضي الله عنه , دريت ان المسج جايه من ربع ايران والاحاديث اللي فيه ماهيب احاديث اصلا . . !!

ومنها اللي يرسل لك مقاطع خادشه للحياء . . يبي يجس نبضك يمكن علشان تتبادل معاه !! واذا مارديت عليه يقول اسف ياجماعه ارسلت لكم بالغلط والا جهازي انسرق !!

واللي سرق جهازك بالله شفايدته يرسل كذا ؟ ههههههههههههه

صارت فيني ثلاث مرات السالفه هذي . . الله اعلم بالنيات لكن السيناريو اللي قلته اقرب !!


بس مايقهرني الا اللي ينقطع ينقطع . . بعدين يرسل لك مليون مسج في دقيقه وحده !!


الموضوع في ذالسالفه يطوول . . بتكلم عليه ان شاء الله اكثر في كل مره يطري علي مستجد فيه . .

[سعد الصميل]

يوم كنا صغار كان فيه واحد بالشارع توه طالع من السجن. . وكانو اهلنا يحذرونا منه !!

كنا نسميه السفااح !! ومن يطلع قدام باب بيتهم يبي يدخن زقاره المسكين ، أول واحد يشوفه فينا يعطينا انذار الخطر . . !!

ويصيح . . السفااااااح جاااااكم !!!


طبعا ماتشوف الا غبرتنا من الرعب !!!


المهم ان السفاح هذا عاده حي ويوم كبرنا صرنا نسلم عليه اذا شفناه !!!! بعد ماكنا نفركلها منه !!!


اللي ابي اوصل له ، ان نظرتنا دايم للمسجون مريبه !! ونشوفه انه خطر على الأمن القومي !!


واهلنا بعد كانو ينظرون نفس النظره ، محد فكر انه شخص عادي . . حاله حالنا. .

وحنا نخطي مثله بعد !!!

كلنا اخطينا وناس واجد منا سوو اخطاء يمكن تكون اكثر من اخطاء المسجون . .

لكن الفرق الوحيد اللي بينا وبين المسجون . . انه يوم سوا عملته . . انمسك ، وحنا ستر علينا الله في امور كثيره وما انمسكنا!!

بالمجمل . . لازم نعرف ان فيه ناس خطورتهم اكثر من المسجون ، لكن عايشين بيننا . . ذولا اللي الواحد لازم يخاف منهم !!!



وللحديث بقيه !!

[سعد الصميل]

اليوم الهمهمات ان شاء الله غير . . وبزياده . . بقولكم مع اخر همهمه وش السبب . . بسم الله نبدأ . . وعلى بركة الله . .



المعاش نزل ؟

بالنسبه لي مانزل لحد الآن . . آخر ناس دايم

طيب . . المعاش نزل ؟

الكلمه هذي لازم تسمعها من ربعك بالدوام . . على اخر الشهر . .

يالربع المعاش نزل ؟ . . ايه . . احلف !! والله !!

يولد شنو بنكك ؟

والله ان بنكي خايس ماينزل المعاش مع الناس . . .

واذا شفتوا الفرق بالتوقيت بين معاش هذا وخويه تلقون السالفه ماتسوى !!

5 او 6 ساعات الفرق !!

المهم . . مو هذا موضوعنا بعد !!

المعاش . . ليه دايم مايكفي ؟

لو كنت موظف عادي وراتبك كحيان . . مايكفيك . . طيب آمنا بالله . .

بس بالكويت . . لو كنت موظف بمكان حلو وراتبك قوي جدا . . ماراح يكفيك !!

طيب وش الحل ؟

بس العزاء الوحيد . . انه فعلا كل مازاد معاشك تزيد مصاريفك . .

قبل عادي تحط بمخباك قلم باركر . . بس اذا زاد معاشك اذا ماحطيت ديور والا كارتير . . تستعر من نفسك !!

الحل الوحيد للسالفه هذي . . . مافيه حل !!

[سعد الصميل]

الحين لو تشوف واحد من الشباب . . . قام من المجلس الساعه 10 او 11 بالليل . .

وسألته وين ؟ . . وجاوبك بنام . .

بتحس ان السالفه فيها إن !! أو اذا انت تفكيرك سليم . . بتقول ايه اكيد انه مواصل من امس . . ورايح يرقد !!

هذا تغير كبير صاير عندنا في وقتنا الحالي . . اللي يرقد بدري انسان مو طبيعي !!

وإذا كان طبيعي اكيد انه مواصل ورايح يعدل نومه !!

تصدقون ؟ والله حتى الشيبان في الوقت هذا يسهرون والطيب فيهم يرقد الساعه 12 !!

قبل يوم كنا صغار والله اذكر اذا وصلت الساعه 11 . . تحس انها جريمه نكراء !!

اذا فتحت باب الشارع الساعه 12 بالليل تحس بأجواء فلم رعب !!

والحين ؟؟

البزران ابو 5 سنين ترجع البيت بعد الفجر . . تلقاه قاعد . . تسأله وش مقعدك ؟ ؟

بيرد عليك وهو مبسوووط . . سهرانين !!

تدرون بشي ؟

انا اتوقع خلال السنين هذي راح يخلون فيه مركز خدمة المواطن . . مناوب بالليل !!

يعني راح يجي اليوم اللي اذا قام خويك نفسه من المجلس الساعه 11 وسألته وين ؟ بيقولك والله رايح أخلص لي مراجعه !!

بالعربي . . حياتنا انقلبت فوووق تحت !!

[سعد الصميل]

قبل يومين كنت انا وواحد من الربع في مطعم بالفحيحيل . . والمطعم هذا معرووف انه زححححمه وازعااج . .

بالعربي كل ماتشووف العمال اللي فيه تقول الله يعينهم . . اشهد انهم ينكرفون !!


حنا كنا جايين المطعم الساعه 11 بالليل تقريبا وقت التشطيب . . لكن برضو كان زحمه . .

ونشوف واحد من عمال المطعم قاعد يغني وطربان . . تلاته تلتو ميه ولا الف وخمس ميه !!

صراحه . . حسيت انه على كثر ماهو يكرف ويتعب . . الا اني شفت نهاية يوم العمل المتعب وفرحته في نهاية اليوم غااامره !!

حسيت ان اللي مثل هذا هو اللي عايش في نعمه صحيح . . العمل ماخذ تفكيره دايم . . ماعنده مجال يفكر بالمشاعر ولا بالوضع الاجتماعي مع الناس . . ولا أي شي غير الشغل بس !!

علشان كذا تشوفه في نهاية الدوام . . يغني ومبسوووط . . لأن وقت الفراغ اذا صار شوي . . الفرحه فيه تكون اكبر . . واستغلاله يكون افضل !!

والا شرايكم ؟

[سعد الصميل]

قبل كم يوم كنت اتناقش انا وواحد من الشباب . . وجاء من طرف السوالف قصة اختراع الفازلين . . وشلون اخترعوه . .

بعدها بالليل رحت لـ العم قوقل وقعدت ادور عن الفازلين وبشوف قصته . . وشفت قصته وعرفتها . .

لكن الحلو بالسالفه . . اني وانا ابحث طحت على موضوع في منتدى نسائي شهير جدا !!

وكان محور الحديث عن الفازلين . . لاحظوا معي . . الفازلين !!

الصفحات والنقاش عن الفازلين وصلت مليون صفحه مدري كم

قعدت اضحك . . بشراهه

اللي تقول زين للمكياج واللي تقول للبزران واللي مدري وش تقول . .

يخرب بيت النسوان . . حتى الفازلين خلو له موضوع وسوالف وصار له مناقشات !!

صراحه . . مالهم حل . .

في كل شي يسولفون ويخلون من الحبة قبه !!

[سعد الصميل]

قبل كان البزران كلهم ضعاااف . . واذا فيه واحد سمين شوي راحت عليه عياره . .

فلان البطه

طبعا ماكانو ضعاف من الفقر . . لا من الحركه والنشاط . .

العابهم كانت كلها حركيه ( غميضه - عنبر - مقصي - كوره - تيل - وحجله للبنات . . . الخ )

الحين الايبود والايباد والبلاي ستيشن . .


فــ شي طبيعي البزر يسمن . . وكثروا البطات . .

وصارو الحين العكس . . اذا فيه واحد ضعييف تروح عليه عياره . . يالبريعصي !!

طبعا فيه متهم رئيسي في انتشار السمنه غير الالعاب . .


إنه المايونيز !!

قبل لا يطلع المايونيز كل شي اوكي . . بعد ماطلع المايونيز . . انتفخت الجنوب !!

تصدقون ان فيه دول واااجد مايعرفون المايونيز !! وان المطاعم بس تستخدمه في الصوص والحركات اللي على السندويشات . .

بس عندنا . . وصلت والله فيه ناي يطلبون فلافل بالمايونيز !!

يعني . . نقدر نقول . . جيل النيدو صار من الرواد . . والقدماء . .

الحين بدأ عصر جيل المايونيز !