(ياللّي غيابك مايفسّره تفسير)=(مدري غيابك صدق وإلا عياره؟؟)

[فهيد بن عصيدان]

صباح الخير ,,

ياليل قزّرتك لحون ومجارير=أكتب بيوتي بين تاره وتاره
وإن دقّ هاجوس الشّعر والتعابير=تهاملت شردْ البيوت إبغزاره
وألاعب المسباح سجّه وتفكير=وأشرب وألحّق بالزقاره زقاره
وإن هلّت إعيوني دموعٍ محادير=الدمع تكفير إلـخطاي إنحداره
فكّرت باللي صار واللي يبي إيصير=والمنتظر أيّس وطال إنتظاره
ياللّي غيابك مايفسّره تفسير=مدري غيابك صدق وإلا عياره؟
ماعاد باقي من رصيدك معاذير=وماكلّ متعذّر قبلت إعتذاره!
العلم؟وشقومك حصل فيك تغيير؟=الظاهر إنّك تالي الحبّ كاره
مدري خطاي إن نيّتي نيّة الخير=وإلا غبا منّي ومنّك شطاره
والا تبي تغييري ورحت للغير=وإخترت عقبي جعلها أمحق خياره!
أرجوك كان إن لي معزّه وتقدير=لاتفرح الحاسد بردّ إعتباره
قد قلت لك كلمه تفوق التّعابير=ولاعادني قايل بعدْها عباره:
أنا إستخرت إمن الهوى والغنادير=(إلا أنت ماظنّي معاك إستخاره!)

فهيد