تدرين انا مانيب داله وسالي
لجلك انا شفت الاسى والاذيه
اي والله ادري مالك اول وتالي
لاشك قلبي مايطيع الوصيه
تركتني فالوقت تايه لحالي
بين الامل والجرح والمهمهيه
اه لو تدري وش اللي جرالي
ماظن تقسى ياحبيبي عليه
صار الشقى صار الوجع والعنالي
تغيرت ذيك الرياح العذيه
الوقت قاسي لو صفالك صفالي
والهم يقتل والطفوله بريه
انا احبك يابعد راس مالي
في عيوني الثنتين هذي وذيه
يأغلى من الغالين واللي غدالي
انت الغلا وانت الوفا والحميه
لالا فديتك لا دور بدالي
فديت عمرك والجروح النديه
ادري من اللوعات مانيب خالي
منك ومن ذيك الحظوظ الرديه
ايه انت قاسي ماتقدر وصالي
ضامي وتسقيني حياض المنيه
دايم خيالك مايفارق خيالي
بينك وبين النفس حسنه وسيه
ياحلو وقتن من زمانآ مضالي
ايام مدري بين روحه وجيه
ايام صغري لو مضت ماتزالي
تبقى وتبقى يالحياة الشقيه
يوم الغلا والشعر ماله ومالي
من قبل اعرفك قبل تصبح قضيه
ياشاغلن فكري وعقلي وبالي
قتلتني لين صرت الضحيه
اسرفت فيني يوم عشقك بقالي
كني خفير وانت قايد سريه
تامر وتنهى ولا حوالك حوالي
خطيتن ياكبرها من خطيه
الله يبيحك ياعسير المنالي
ويسامحك من طيب نفسآ رضيه
وانا على الله يالرفيق الموالي
اشيل حملي كبر هضبة طميه
يحق لك تشرب قراحن زلالي
ماعشت مثلك بين حوضآ وفيه
اطغاك حسنك والترف والدلالي
حتى القصايد تحسب انها هديه
يلي تتل القلب مانيب سالي
شفت العنا ذقت الاسى والاذيه
المبدع / ناصر بن كروز
العرض الشجري