قصيدة نادرة

[دغيفس]

يا نديبي قم ترحل بالجواب=فوق حر ما يجيب الطير جاب
بعيد ملوى الزور عن ملوى العضود=يعلم الله ما تباريه السحاب
هارب يقطع مسير العشر خمس=دارب مع كل درب ما يهاب
راعي نبت الحيا عام يزيد=مع مروية الهنادي والحراب
يعفج ارقاب الزهر في كل روض=بالاناس وبالقفور من العداب
منوته قطع الفيافي والفجوج=كن زوله مع ضحاضيح السراب
زول ربداً حين خفت بالجفال=صفَّت الجنحان قفت بالرعاب
أو كما الشاحوف طاوع للنسيم=سابح بالخام في بعض الغباب
هب من ركن اليماني له عوين=واستقام شراعها بالارتكاب
راكبه عن كل هم مستريح=ما يهاب من الدروب اللي صعاب
ما عليه إلا العقيلي والخروج=وشربتين والعديل من الزهاب
أو شغل بعض العماهيج الجميل=واردات مثل جنحان الغراب
واثق مامون يكفيه الوصاة=في نجيره جالس مثل العقاب
يقطع الفرجة بعزم ما يبور=بالظلام أهم من ضار الذياب
يوم ركبه من ربى مصر وسار=قلت ريض قدر ما اكتب لي كتاب
فيه اثني بالسلام اللي فضيل=عد ما هلت هماليل السحاب
يوم سابع بامر رب العالمين=زاير من هو عطي فصل الخطاب
بالصلاة اثني عليه وبالسلام=عد ما غرد حمام بالهضاب
راكبه من ديرة فيها الرسول=في حكم من سايله ما قط خاب
يا نديبي لا تونَّى بالمسير=يوم خامس ملفي دار الاحباب
عند اخو نورة عشير الغانمين=مثل عد ما يغور من الشراب
يا ذعار ان كان للشكوى مجيب=اشتكي لك من هوى تلع الرقاب
سم حالي سقمها نجل العيون=حين اشوف كفوفها فيها الخضاب
مصمت الحجلين عندي كل يوم=دايم قدام عيني ما يغاب
احور العينين كاسيه الجمال=كن خده بدر نصف بالحساب
وارد القرنين ملعوس الوجان=تشتكي من ضيم ردفيها الثياب
نافل جيله وهو توه صغير=بالجمال اليوسفي ترف الشباب
بالتعجرف والتغطرف والدلال=مع دلوله ذي فهو نزه الجناب
والدروب من الملام اللي تعيب=ما يجيه ولا يدوس اللي يعاب
بالمودة ضامني واصبح حشاي=كن مع جمر الغضا فيه التهاب
ميراكنه بالتهرج والسكوت=حيث من يدري على عرضه يثاب
خايف من رمي مبغض أو سفيه=أو فدام ما يعرفون الآداب
سل لي سيف الهوى لي من عناي=والحقه بي صاحبي لين القضاب
سهمتي بين الملا جر الونين=من فراق اللي كما ظبي الحداب
وان ذكرته هل من جوف النظير=دمع عيني فوق خدي بانسكاب
اسمها ستين خط وميتين=زود خمس يكمل اسمه بالحساب
اسم ناب الحال نابي الردوف=هايف الخصرين مجلي العذاب
لبسه الديباج وانواع الحرير=طيبه العنبر ولو غالي يجاب
لا ذكرته صرت أشد من العليل=علةٍ بار الدوا فيها وساب
بالمودة ضامني ضافي الجعود=دار بعزومي وهي قبله صلاب
ذا وصلى الله على سيد قريش=عد ما القمري لعى فوق الهضاب

تعريف بشاعر
هو عمر بن سعود(الكبير) بن عبدالعزيز بن محمد بن سعود وعمر هذا هو أحد الأقطاب في دعم
الدولة السعوديه الاولى وبنائها، وله مواقف مشهورة في حرب الأتراك للدرعية؛ فكان يسد ثغرة واسعة في الدفاع عن بلاده,, هي شعيب الحريقة وما جاورها من المتاريس,, وله قصر
شامخ في حي الطريف لا يزال شامخ البناء رغم عوادي الزمان، وعوامل التعرية,, يعرف الآن بمقصورة عمر

كان ممن نجوا من مذبحة الدرعية وعندما هرب اخوه مشاري(الذي قتله غدرا ابن معمر) من مصر وعاد لنجد وبايعه الناس قدم إليه اخوه عمر بن سعود وبايعه ومعه أبنائه عبدالله ومحمد وعبدالملك
رحل الى مصر في عام 1236ه بعد حملة حسين بك على نجد وسجن فيها ثم قتل هو وابنائه وكانوا آخر ذرية آل عبدالعزيز بن محمد رحمهم الله جميعا