!! .. وداع العـــــزّ .. !!

[صمــت اليتــاما]

السلام عليكم ورحمة الله وبركاته



,

ليا صارت هروج الناس عن لاماك تحدانـي=فمـان الله ودربٍ جابنـي يمّـك يودّيـنـي
أنا ماأبغاك تحمل شرهة العالم علـى شانـي=ولاودّي تشوف من الزمـن ماشافتـه عينـي
ياكثر العالم اللـي بيـن جيرانـك وجيرانـي=مشافيحٍ على هـرج القفـا والنـاس مقفينـي
وياكثر العالم اللي هرجها لـو هـزّ وجدانـي=أكابح هرجها باالصمت حتـى لـو يجزّينـي
عليّ الله وأمانه لو أعيـش العمـر وحدانـي=ماأسولف للعرب باالقصّه اللي بينـك وبينـي
يكفّيني منادم خافقي عـن وضـع حرمانـي=ولاأبيّن لـو إنّ الـدمّ يجمـد فـي شرايينـي
هذا عهدٍ عليّ إن كان طال العمـر وأمدانـي=وإذا حال القدر تكفى إعتبر من ماضي سنيني
إخذ درسك من دروس السنين العوج مجّانـي=قبل بكـره تقـول المشكلـه ماعـاد يمدينـي
ترى دروس الزمن ماتفرق الأول من الثانـي=دفاترها القلوب وتكتـب بـروس السكاكينـي
لاينعى الوقت راسك قبـل لايوفـي وينعانـي=وأنـا ماقلتهـا الا حشمـةٍ لأغلـى عناوينـي
أنـا ويّـاك يكفينـا مـن الأيـام ماجـانـي=ماأبيك تشيل دين الوقت وأشيله علـى دينـي
وأنا حافظ وصاة الشايب اللي يـوم وصّانـي=على حفظ المعزّه مع هل الحشمـه موصّينـي
أبوادعك مثل أول نهـارٍ جيـت لـك عانـي=على شان (إ)تعرف وش كثر مهما كنت تعنيني
وداع العزّ حفظ لسمعتك من هـرج عدوانـي=وداعٍ مثل توديع إبن عـون لطيـره الصينـي

للشاعر: نايف العتيبي


,


أختكم صمت اليتاما


,