الى كل رجل معتر....

[الظبيه العنزي]

تدري وش اللي يتعب البنت ياخوي؟
رجلن يخون اشواقها والموده

اللي احتاج الغلا صار نمرود
وليا شبع مما عطاها استرده

البنت ريحانة غلا ناعمة عود
تبي لها رجلن ورث طيب جده

رجلن فعوله كلها جود
مايلتفت للي كفوفه تمده

رجلن الاجته الليالي بمنقود
يتكي لها مابيح الوقت سده

مهوب خبل مارعى للهوى عهود
وادناة ماعارض طريقه يرده

ولاهوب لاعله ولاهوب ملهود
ولاشكوك وكل طاري يحده

ما اشين من الرجال لا جاك ببرود
وان قال له ترف القدم شي صده

تبي لها براق طيب له رعود
ان اجدبت يمطر على ريف خده

وان نادته تكفي لقت عنده الفود
يشيل عزتها على قو زنده

كفه نفل وانفاس صدره لها عود
وظلاله الضافي بيدها تمده

البنت خد وقد ونواظرن سود
وريحة غلا ياسعد من شم نده

البنت الا ضحكت ثمرها لك ورود
ياخوي من يقطف نواوير ورده

واللي يهين البنت ناقص ومقرود
فرس غلا.....ماهي حمارة مكده


استمتعوا بصفات المراجل...... وتمنوا لعل وعسى.,
وتقبلو حبي ..........,
"الظبيه السويلمي الدهمشي العنزي"