همــهـــمــات سعد . . !

[سعد الصميل]

بعد 5 ايام غياب عن الهمهمات . . رجعنا لكم بشوق لكم ولمتابعتكم . .

ادري ان الهمهمات وحشتكم اكثر . .



في هذي الايام من السنه . . . اذا كنت بالوادي . . راح تستمتع بالبراد في الليل !!

تشوف لك طعس نظيف . . وتجلس فيه ويهفك الهوى المنعش الخالي من دخان مصانع ميناء عبدالله . . طبعا !!


ياسلاااااام !


لا جد ياجماعه . . الوادي بالليل الجلسه فيه تحس انها نظيفه . .

والهدوء ولا احلى . . تسمع صوت التريلات من بعيد تالي الليل !!

وعلشان تحلو الجلسه . . تسمع صوت صرصور الليل . . عرفتوه والا اشرح لكم وشهو ؟

طبعا صرصور الليل يزعج . . بس الحلو فيه انه يحسسك انك في مكان هادي . . لدرجة ان صوته يسبب لك قلق !!

والله اني مبطي من الجلسه ذي . . شكلي بهاجر للوادي علشان اعيش اللحظات . . والهدوء . . . واستمتع بصوت صرصور الليل !!

[سعد الصميل]

جائزة المخ !!

قبل يومين سمعت بالراديو ان الدنمارك توزع جوائز سنويه للابحاث العلميه . . وقيمة كل جائزه مليون يورو . .

ياسلامي على الجوائز بس . .

وقالوا بالخبر ان علوم المخ فاز فيها 3 اشخاص . . فـ شافت الدوله انها تكافئهم كل واحد بنفس الجائزه !!


طبعا جوائزهم للعلم ترى متفرعه . . يعني الطب مو لحاله مليون يورو . . لا لا . .

مثلا علوم المخ لها مليون يورو . . طب الاعصاب مليون يورو . . العين مليون . . القلب مليون . . التكنلوجيا مليون . . النبات مليون . . الخ الخ . .

يعني شوف الدوله عندهم كم مليون تحذف على العلم !!


سألت واحد من الشباب له خلفيه بالامور هذي بالكويت . . وقالي قيمة جائزتنا بالكويت يذكر انها لا تتعدى الـ 25 الف دينار . .

في دولة عادية بالنسبة لأوروبا . . يعطون مليون

وحنا 25 الف دينار . . وتبون علماء بعد ؟


تلومون الناس اذا صارت حراميه ؟ والوزراء والوكلاء والنواب اذا سرقوا؟

[سعد الصميل]

نعمة النسيان
النسيان . . ذكرته مليون مره هنا . .


ومازلت اعاني منه . . لكن نسيت اذكر لكم ان النسيان بالفعل نعمه !!

قبل كم يوم سويت خدمه لرجال . . وبعد ماسويتها ذكرني شخص وقال ياخي هذا مايستاهل !!


قلت ليه ؟ قال هذا فيه وفيه . . ماتذكر يوم موقفه البايخ اللي سواه لك انت في ذاك الوقت !!

طبعا انا كنت ناسي موقفه البايخ ورايح عن بالي . . لكن ذكرني فيه خوينا !!

بعد ذالسالفه . . تأكدت ان النسيان نعمه . . نساني فعل شين لشخص وخلاني اترفع عن الرد عليه بموقف بايخ وخدمته !!

بالفعل النسيان نعمه

[سعد الصميل]

شووووووت !!

في سنة 1999 او 2000 . . ما اذكر بالتحديد . . لكن اللي اذكرة انها كانت في الايام الظلماء

ايام البطاليه . . وانتظار الوظيفه !

المهم . . كنت جالس في الدوانيه ومعاي دينار واحد فقط . . . ومعاي واحد من الربع نفس حالتي بكل شي . . . إلا الدينار . . ماكان معاه دينار !!

يعني الفرق بيننا كان دينار . . فقط لا غير !

ماعلينا . . الوقت كان الفجر . . وكنا جواعا وسهارى . . فــ جاء الاقتراح من صاحبنا سريعا . .

هو : سعد . . معك فلوس ؟

انا : ايه بس مامعي الا دينار !

هو : طيب حلو حلو حلو . . .

انا : العلم ؟

هو : يولد نبي نتريق ! ذبحنا الجوع . .

انا : ابشر يله مشينا . .


وحنا بالطريق قام يوسوس فيني الشيطان . . ويقولي . . يولد ترى اترك منك الريوق واخذ لك بطاقة شووت (( بطاقات دخول مباريات بالشكل , لكن بالمضمون بطاقات حظ نصيب . . ظهرت في ذاك الوقت وكانت جوائزها خرافيه . . توصل 100 ألف دينار ))

قلت لخويي . . يولد تبي الحين نتريق مطعم هندي ريوق شحذه بالدينار . . والا تبي نجرب يمكن نتريق في فندق 5 نجوم ونحجز لنا جناح ملكي عقب الريوق . . وننام لنا فيه احلى نومه . . وبعد مانقعد نسافر لأحلى ديرة وننسى البطاليه المعفنه . . ولارجعنا كل واحد دق له موتر يستاهل . . . . الخ الخ الخ . . . وبدت تزيد الاحلام وكأن الجائزه 100 مليون

واللي يشوفني وقت الشرح يقول ابو الشباب ضمن !!

صاحبنا مافهم . . شرحت له اننا ممكن نشتري شووت ونربح !!

وما اقتنع . . آخر شي قلت له يولد . . يا اننا نفطر صح والا عننا مانفطر !! هنا اقتنع !!! ياسلام عليه بس

رحنا للبقاله وخذينا بطاقة شووت ومسحنا . . وطبعا كالعادة طلع لنا . . حظ اوفر !!!!

هههههههههههههههه


القصه ما انتهت !!!


انتهت الاحلام والدينار راح . . وش الحل ؟


صاحبنا عصب علي . . العن . . . لابو . . . يانذل . . .ماخليتنا نحمد ربنا ونفطر ونرقد وحنا شباعا !! ههههههههههههههههه

الكلام هذا كان الساعه 6 الصبح . . . رجعنا للبيت . . فتحت الثلاجه وفااضيه . . لأن البيت كان كله فاضي مسافرين قدلهم اسبوع . . الثلاجه مافيها الا طماط وبطاط !!

دخلت المطبخ وقعدت احترف . . وضبطت لنا كبسة عيش + بطاط + طماط . . . وكلينا ورقدنا شبعانين على الاقل !!

كل ما اذكر ذيك السالفه . . انصرع من الضحك . . واقول . . .


كم كان موقف غبي !!!

[سعد الصميل]

دايم اشتكي لكم عن الذاكره . . عندي !!

ودايم اشتكي انها ضعيفه . . .


قررت اتوجه لمكتبة جرير بعد نصيحة احد الاعزاء . .


وكان الهدف . .

[سعد الصميل]

ادري ادري اشتقتوا للهمهمات << بالله ياشيخ ؟

المهم . . والله وحشتونا . . وجيناكم نهمهم عليكم تالي عصير . . وش حيلتي اردها لا تجيني ؟

محد فهم شي ادري . .

يله ياحبايب . . خلصت الغشمره وبدأ الجد !


نتوكل على الله ونتهمهم . .

بسم الله وعلى بركة الله . .

[سعد الصميل]

انا الزعيم !!

قبل فتره . . كنت مسير على رجال . . خذيت لي عنده فنجال قبل العصر . . اذن العصر . . رحنا للمسجد نصلي . . وكان المسجد جديد و شغل 5 نجوم بالتأثيث والديكور . . لكن كانت مشكلة عويصه في المسجد . . التكييف مسكر !!

طلعنا من المسجد . . واول موضوع كلمت صاحبنا فيه . . قلت ياولد وش علم التكييف ؟؟ قال مبطي وهو كذا !!

قلت ليه ماقلت لنا الله يسامحك نشوف مسجد بارد الواحد يصلي فيه بدون مايشغله الحر والا غيره !

رد . . . خلها على الله !!


المهم . . بعد ماعودنا للدوانيه والمكيف البارد والماء البارد . . وخذينا فنجال ثاني . . سالته مره ثانيه ! ! << نشبه

قال يابو محمد . . عندنا شايب في شارعنا مهوب صاحي . . يحسب ان المسجد له مهوب لله والمسلمين !!

بعد شرح طويل من خوينا فهمت التالي :

ان الشايب الحلو ذا يستبرد بسرعه . . ومايبي التكييف شغال وقت ماهو موجود . . واللي فيه خير يقول شي !!!

اذا الجو عاجبه . . يفتح الدرايش كلها واللي فيه خير يصك دريشه !!

اذا طفى المكيف والناس تبي تفتح الدرايش . . يصكها كلها بحجة ان فيه غبار . . واللي فيه خير يفتحها !!!


لحد يشغل المراوح بدال التكييف . . لأنها توجع راسه . . واللي فيه خير يشغلها !!


الخ . . . الخ . . . الخ . . . !!!

مختصر مافهمته . . ان الشايب ذا ملعون صفحه !! ويبي يكون هو المتحكم الوحيد بالمسجد !!

صدمني الصراحه وضعهم وكسروا خاطري باقي اهل الشارع . . طبعا انا متأكد انهم مو خايفين من الشايب ويقدرون يحطونه هو وعواله بالقاع ويدعسون عليهم

لكن احتراما لكبر السن . . بالفعل فيه مشكله كبيره اذا كان واحد كبير سن يسوي افعال بايخه . . ماتقدر تخانق معه !!

لكن بالنسبه لي . . هو أساسا ماحط اعتبار لكبر سنه . . وما احترم نفسه . . فـ بالتالي . . ماراح احترمه وبشغل التكييف . . واللي فيه خير يسكره


طيب اصبر اصبر انت وياه . . السالفه ماخلصت !!


بعدها بفتره . . رحت لخوينا وجاء وقت الصلاه . . يله مشينا ؟ قلت آسف مابي اصلي

قال افاا . . . قلت نعم امش مسجد ثاني مسجدكم ذا مابي اصلي فيه . .

قام يضحك . . قال لا لا ابشرك المشكله انتهت . . . سألته . . العلم ؟؟ وكيف ؟؟


قال فيه كم واحد اشتكوا عند الاوقاف على طريقة الشايب . . وخلوا تحكم التكييف في غرفة مقفوله ومفتاحها مع فني الصيانه مال الاوقاف ويمر على التكييف كل فتره . . او بالتصليح بس

الله يجزى وزارة الاوقاف خير . . فكتنا من ذالشايب العايب

[سعد الصميل]

قبل أمس بالسياره . . . معي احد ابناء العمومه . . . مرينا عند مركز سلطان المنقف . .

وشفنا سيارة البلدية . . تنظف . . . المنظر بالفطره شي جميل . . ناس ينظفون . . حلو حلو !!

لكن اللي مو حلو هو الطريقه اللي يتم فيها التنظيف . . والقذارة اللي شفناها !!


سيارة البلدية واقفه . . والعمال كابين الزباله ( أعزكم الله ) بالقاع !! علشان ينبشونها ويطلعون القواطي والحديد والنحاس والكراتين والورق . . . الخ !!

مسوين فيها اعادة تدوير !! طبعا انا ماني حاسدهم على بيعها . . لكن مو كذا تجمع !!

وسخوا القاع والله علشان يطلعون نصيبهم !!

سمعت مره سوالف دواوين . . يقولون ان فيه تاجر تايلندي يسمونه . . ملك الخرده !!

سمع ان الكويت زبايلها ( أعزكم الله ) تنوخذ بالكامل وتندفن . . انصدم !!

وانصدم اكثر يوم درى ان شركات التنظيف تاخذ فلوس من الحكومه ومبالغ خياليه علشان ذالشي !!!

وانه قال اني مستعد ادفع للدوله فلوس . . وامسك عقد الذهب اللي بالخرده !!

يعني بيسوي نفس طريقة البنغاليه بس . . بطريقه منظمه مو قذره مثل ماهم يسوون !!

وثاني شي يفك الدوله من دفع مبالغ طائله على شركات خايسه وحراميه !!


والا ؟

[سعد الصميل]

الزبال طول عمره زبال !!


على طاري الزبالين . . خلوني ادخل بموضوع مشابه . . علشان نخلص من الريحه الخايسه بسرعه



في اليابان . . . مايرضى الشعب انك تسميه زبال . . سمه مهندس النظافه !!

لأنهم يحترمون كل عمل يخدم فيه الانسان البشريه . . وماينزلون من قدره !!


وفي بريطانيا . . . الشعب يخاف منه جدا . . لأن بريطانيا كانت تعاني هالأمر من زمان ان الوظيفه ينظر لها بقرف . . فـ حطوا فكرة حلوه . . ان كل موظف له صلاحيات على المواطن . . فــ صارت كل الوظايف الناس تحترمها بالغصب !!

ومن الوظايف . . الزبال . . في بريطانيا معاه دفتر مخالفات . . واذا فيك خير خل زبالتك ( أعزكم الله ) مو مسكره او موضوعه في مكانها المناسب . . او اي مخالفه ثانيه . .

يطلع الدفتر ويحكك مخالفه

لكن في بلداننا ؟ الزبال يبقى زبال . . وظيفه وضيعه ومايتوظف فيها الا وضيع !!!

مع انه في حديث ورد عن الرسول عليه الصلاة والسلام . . ان اللي ينظف المسجد مايمسه عذاب القبر !!

طبعا مع فارق الشبه بين المسجد والمكان العام . . لكن التشبيه بالمعنى العام . . النظافه . . او التنظيف !!

يله . . خلينا كده عمياني . . الناس قدام وحنا ورى . .

[سعد الصميل]

وصلتني خبرية طازجه . . . فرحتني جدا جدا . . .

بلغني احد الشباب وقال روح قوقل . . واكتب همه !!

وسويتها . .



وبعمليات بحث تجاوزت الــ 53 ألف بحث عن الهمهمات . . .


بس عداد المنتدى يقول ان الزيارات 7 آلاف . . من اصدق ؟



الحمد لله الذي بعزته و جلاله تتم الصالحات . .

اعجز عن شكركم والله . . بجد تحرجوني. . مع اني مقصر معاكم كثير . . لكن احرجتوني وماعاملتوني بالمثل . .

بس لازم اشيك من كذا جهاز علشان اتأكد من الخبريه . . علشان اعطيكم همهمات اكسترا الليله

جاهزين ؟