همــهـــمــات سعد . . !

[سعد الصميل]

تخيل نفسك فنان في شي معين . . وقمت بوسط السوق وسويته قدام الناس . . لاحظ الناس اللي بيمرون عليك . . طبعا أنا متأكد انهم ماراح يسوون دائره عليك ويشوفون وش قاعد تسوي ويشجعونك نفس الاوربيين او الامريكان . . وثانيا كل من مر بيقول استغفر الله وش يسوي المهبول !! ويقول الحمدلله على نعمة العقل ويمشي !! بتشوف ناس تطالعك من بعيييد وناقدين عليك !!


طيب طيب . . خلونا نغير المشهد !!

تخيل انك اوروبي او امريكي . . سويت ابحاث وتجارب ونجحت في اشياء وخدمت العلم بشكل طيب . . او اخترعت او سويت شي يخدم الناس . . او عمل ابحاث خدمت البشرية . . وش المقابل لك ؟ ملايين صح ؟


طيب يله الحين تخيلها بالعكس ؟ او نخليها الواقع المرير !

انك عربي وفي بلدك وابدعت ؟ مافيه مقابل طبعا !! واذا فيه بيكون تشجيع معنوي سخيف بالكلام بس و مبلغ زهيد يفشل !! هذا اذا فيه مبلغ طبعا

والاوربي اذا ابدع في بلده . . يلقى كل الاهتمام والدوافع اللي تخليه يبدع !!



تدرون ؟ ؟ ؟

بناء على الموقفين الاوليه اللي قلتها . .

بإختصااار . . .


في أوربا الناس مستعده لترى حتى سخافاتك . . . وفي بلداننا الناس غير مستعده لترى حتى إبداعك !!



وإلا ؟

[سعد الصميل]

تخيل . . لو انك تداوم بالسنه يوم . . وراتبك عالي جدا . .

وانك ماعمرك جاك مرض . . ولا وجع في حياتك كلها !

طيب . . تخيل بعد انك عندك من المال مالا يعد . .

وعندك من الجاه . . ماتحسد عليه . .

كافي ؟

لا بعد بعد


تخيل انك كل ماتطلب شي يوصل لك بدون ماتتعب فيه ! وتخيل انك ماعمرك مرت عليك ضيقه ابد !


تخيل ان علاقتك بخلق الله كلهم ممتازه , وما عمرك صار لك موقف خايس مع اي شخص في حياتك !!

تخيل انك ماتحتاج تركض ورى الشي علشان تاخذه . . تخيل ان كل شي يجيك وانت قاعد !

من الآخر ؟ تخيل انك احسن واحد

تتوقع انك راح تكون مبسووط في حياتك ؟

الجواب طبعا لا ! والاكيد انك راح تكون شخص فاااارغ . . ماحكتك الدنيا علشان تتعلم من اخطاؤك . .

ماجربت الشقى علشان تفرح بالفرج !! حياتك كلها فرج في فرج . . ماراح تحس بطعمه لأنك مافقدته !!

بإختصار ؟ الدنيا حلاتها كذا . . تتعب علشان ترتاح !

تشقى علشان تتلذ بطعم الفرج , تمرض علشان تفرح بالعافيه , تقحط علشان تفرح بالفلوس . . .


ان ماكانت كذا حياتك . . صدقني . . انت شخص تعيس للغايه . .

روح صير مدمن مخدرات احسن لك

[سعد الصميل]

الذكي والغبي . . وجهان . . لعملتين مختلفه !!

دايم الشخص الذكي . . يغار من الذكي اللي نفسه . . لكن الغبي دايم يكون معجب بالذكي !

والغبي دايم يكون صديق الغبي . . لكن الذكي دايم يكسر خاطره الغبي !

الغبي اذا سوا نفسه ذكي ينكشف بسرعة , لكن الذكي لو سوى نفسه غبي ماتكشفه لو تموت !

الذكي مو دايم يكون موفق , والغبي مو دايم منحوس . . ياما شفت اذكياء وضعهم مزري . . واغبياء الدنيا ضاحكه لهم وماشيه معهم حلاوه !

الحصيله طيب .. ؟؟

قدر الذكي والغبي . . مكتوب . . وكثير يكون الذكي مكتوب عليه الشقاء بعقله قبل دنياه . . والغبي مكتوب عليه راحة البال في حياته !!

ذكي غبي

غبي ذكي . .

احد فهم شي ؟

مو لازم , يكفي اني فاهم وش اقول !!

[سعد الصميل]

من اليوم وانا اتصفح الهمهمات . . واكتشفت التالي :-

1- اكتشفت اني مميز بالكتابه الساخره واعجبت في نفسي , وتميزت بالكتابات الاجتماعيه مع اني كنت ناوي في البداية ان الهمهمات تكون اكثرها سياسيه ! ( هل هذا مايسمونه بداية السقوط او الغرور ؟ )


2- اكتشفت ان الهمهمات تحولت الى مدرسة , فـ الاسلوب وطريقة السرد انتقلت منها العدوى الى اماكن غير الهمهمات ! ( اقدر اقول اني تحولت من شخص مرح وساعي لكسب اكبر شريحة من المتابعين وخوش ولد الى شخص جاحد لمتابعينه وثقيل دم ؟ )

3- اكتشفت برضو ان فيه ناس ولو كانو قليلين بس انهم متابعيني جدا جدا جدا جدا , لكن ما ادري وش السبب ! مع اني اشوف فيه اركان ارقى وافضل من ركني ! ( نقدر نقول اني تواضعت مثلا ورجعت لوضعي الطبيعي علشان اكسبكم ؟ )

4- اكتشفت ان فيه همهمات معينه ماني مصدق اني كاتبها , حسيت اني وقتها كنت ارسطو او سقراط او شي من الخبلان القديمين اللي لحد الآن الناس قاعدين يبجلون فيهم ويحبونهم ! ( وبعدين معاك يالطيب ؟ والله شفت نفسك صحيح ترى ! )


5- اكتشفت ان فيه ناس الهمهمات تمشي على كبودهم بدون ما ادري وش السبب , مع اني احاول دايم اني اكون خفيف ظل وطله وما احب اغلط بأحد ابدا ! ( والله ندري انك خوش ولد هات اللي بعدها )


6- اكتشفت اني صريح جدا وفيه همهمات زعلت ناس , والهمهمه هذي بالذات اثبات لذلك , فـ اللي يدور بخاطري اقوله ولو كان على حسابي مرات !

طيب . . هذي بداية اليوم . .

بسم الله ونبدأ نتهمهم لعيون الحلوين . .

[سعد الصميل]

مرات تكون في الطريق السريع ويجيك واحد يمشي بشويش , بس تدعس يدعس . . ودك تقوله استانست ؟ سبقتني ؟ ياحظك


ومرات تكون في الطريق ويجي وافد يتمشى قدامك ويمشي 20 . . ودك تقوله افتح يابن الكلب ! << للأسف الكلمه قليلة الادب هذي اقولها دايم

لدرجة ان حمود ولدي يوم كان يسمع مني زماان كان دايم يردد وراي ( ابوت ابو تب ) << الترجمه : العن ابوك لابو كلب !! بس عقبها غسل ايده مني ونقد علي وكبر عقله ومعاد يرددها . .

فيه ناس تشوفه يدخل بين السيارات ويسوي بتوين وحركات وماشي مليون . . وانت تدري انه ماوراه شي بس هذي سواقته . . والمشكله سرعته جنونيه وتلقاه كذا مره بغى يعدمك او يعدم سياره ثانيه فيها بزران وعائله . . ودك تقوله الله يريح الناس منك . . بالطريقه اللي يكتبها الله عاد شوف هو و قدرة المكتوب وشهو


مشاهدات الطريق .. واااااجد

بس خلوني اتفرغ على يوم واقعد احصيها وحده وحده واجيب فيها همهمه كبيــــــره

[سعد الصميل]

فيه نوع من الاصدقاء , او ربع الفلس كما يحلو لي تسميتهم

يكون معاك ميه ميه . .


تقوله . . نطلع مجمع ؟ يقول مشينا . .

تقول نطلع سينما ؟ يقول مشينا . .

تقول نروح مطعم ؟ يقول يله مشينا . .

تقول نروح لدوانيه ؟ يقول يله مشينا . .


بس من تقوله نروح اخلص لي شغل والا معامله والا اي شي مايشوف منه فايده لنفسه . .


يقول لا والله مالي خلق !!

ودك تقول لنفسك مرات . . انا وش ابي فيه ؟ مادامه شخص ماخذ السالفه معاي بس بالتقزيره . . ولا جات على اي شي غيرها حتى لو كان خفيف مايبي الا فرقاك !

[سعد الصميل]

اشياء واجد نحسد عليها البزران . . اهمها البراءه وقلة الهموم وعدم المسؤليه . . وغيرها

لكن فيه ميزه عندهم عجيبه . . متى ماطقت براسه وضاق . . بكى

المشكله ان المعادله هنا صعبه . . البزر يبكي على اي شي حتى لو كان تافه , وانت لو تجيك مشكلة وضيقه كبيره ماتقدر تبكي . . ليه ؟ مدري !

ياخي ودك الواحد لا ضاق دن الهاشميه , وغسل كبده . . ترى فيه دراسات تقول ان البكاء مفيد للصحه !

طيب لحد يفهم اني قاعد اكتب وانا مليان ضيقه . . لا . . الحمدلله الوضع اوكي ومحد ضربني ولا بكاني بس طرت علي . .

ماعلينا . . السؤال المهم وخلاصة الموضوع هذا . .

الدموع . . . ليه طعمها يكون مالح ؟

<< اطلع برااا

[سعد الصميل]

صباح الخيرات للجميع , مبطين ماتهمهمنا عليكم . .

بسم الله وعلى بركة الله . .


اختلف الناس في تحديد طريقة دخول الذكاء الى عقل الانسان , فيهم اللي يقول انها تجي للشخص بالفطره , وفيهم اللي يقول انها مكتسبه !

انا من النوع الأول , اقول ان الذكاء يجي بالفطره , يعني تشوف الشخص من يوم انه بزر وهو فطين وسريع بديهه . .

ماعلينا . . ندخل بصلب الموضوع . .

فيه ناس من الغير اذكياء , طبعا ما اقصد الاغبياء , حاشى لله

لكن فيه ناس عقولهم تقدر تقول انها متوسطه ماهيب ذكيه لكن ماهم اغبياء . .

لكن تشوف فيه نوع منهم يحاول يتظاهر بالذكاء , او خلوني اسهل المعلومه اللي اقصدها . .

يحاول ويبذل اكبر جهد عنده علشان يظهر بمظهر الذكي قدام الناس . . يعني يحاول يعرف مثلا عن كل شي , يحاول يكون او يتظاهر بالذهن والفطنه ! يحاول يحسسك انه ذكي , لكن المسكين مايدري انك تحس انه غبي !

بس تصدقون عاد ؟ النوعيه هذي احترمها , قاعد يحاول يوصل لشي ماجاه بالفطره . . يحاول ويحلم انه يكون ذكي , مو نفس بعض الاذكياء .. تلقاه ذكي بالفطره بس حيوان عزكم الله

مايبي يشغل مخه , مايبي حتى يظهر ذكاءه . .

ذولا . . مع مرور الوقت . . يتلف عقله . . ويصير غبي مع الوقت !!!

[سعد الصميل]

بما اننا اليوم الجمعه خلوني اصير واعظ , على الاقل ابي اكسب حسنات من وراكم . .


مهوب كله حش في خلق الله


بما اننا تكلمنا عن الذكاء والغباء , الشيطان ذكي . . جدا !!

يعني الهيس مايقولك صير كافر وفلها على طول !!


يقولك في البدايه ياعمي انت لك خلق تصلي الحين في الحر ؟ تقدر توضى بالماء الحار ؟

ياعمي خلها صل الظهر مع العصر . .


لا جاك وقت العصر قال لك ياولد اصبر شوي بس وصل , بس خلص اللي بيدك . .


بعدها ماتدري الا المغرب دخل عليك !!

يجيك المغرب . . يقولك ياولد الحين وراك ظهر وعصر ومغرب !! الحين اصلا شكلك راح تتفشل لو تصليها قدام الناس كلها . . بيقولون وش ذالخبل اللي يجمع صلاة يوم كامل . . لا وصلت البيت اجمعها مع العشاء !!!!


توصل البيت يقولك , ياولد والله انك كودت الصلاه ورى بعض . . . خلها اليوم والله يغفر لك ان شاء الله ومن بكره ابدأ صل بإنتظام . .

ويبدأ بكره . . ويخلق لك اعذار ثانيه . . لين مع مرور الوقت . . .


تلقى نفسك صرت كافر مع مرتبة القرف


يبه تبون اسهل عليكم السالفه ؟؟

الله قال (( ولا تتبعوا خطوات الشيطان ))

يعني الشيطان يجيك بخطوات مو مره وحده يقول صير كافر !

يله شويات ونجيكم بهمهمات جديده . .

[سعد الصميل]

الشيبان دايم الله معطيهم الحكمه والعلم والالمام في اكثر امور الحياة . .

ودايم اذا نشدتهم عن شي تكون مقتنع بوجود الجواب عندهم خاصة في السوالف او العلوم القديمه لكن للأسف الامور الجديده تلقاهم جاهلينها . .


ماعلينا . . .


فيه الحين الشيبان المعاصرين اللي يعرف الامور القديمه والجديده. . والنوع ذا من الشيبان فايدته لك اكبر من النوع الاول . .

لكن برضو بيكون جاهل بعض الامور . . . يعني الزبده انك منت لاقي شايب يجمع العلوم كلها للأسف . .

ما راح تلقى شايب يعرف تاريخ وسياسه ورياضه واقتصاد وعلوم . . . الخ


بس انا احمد الله اني اعرف لي عوود يعرف اجابه لكل اسألتي ويجاوبها بدون مايخطي . .

اعتبر وجوده في حياتي نعمه من نعم الله علي . . .


انه . . . العم / google عسى الله يمد في عمره . .

مع انه بزر بالعمر . . لكن كبير بالفعل . .


كبير ياقوقل . . والله انك اغنيتنا من نشدة خلق الله