ابا اسألك وارجوك عطنـي اجابـة
وش فايدة صدك عن عيون مغليـك
غير الهموم وضيـق خلـق وكآبـة
إن كان هذا الوضع يازين يرضيـك
طبعـك تغيـر حـيـل ياللغـرابـة
وانا بعد غيرت مـن نظرتـي فيـك
أصبحت حلم مـات بـأول شبابـه
عيـا زمانـك لا يحقـق أمانـيـك
خـلاص ماهـي ياحبيبـي طلابـة
رح في طريقك وأعشق اللي يخاويك
مابينـي وبينـك علاقـة تشـابـه
عندي مبادي تختلف عـن مباديـك
أنـا أداري سمعـتـي والقـرابـة
وانته بعد عن هرجة الناس اداريـك
كان الوصل بينـي وبينـك سحابـة
وليا اجدبت دنياك تمطـر وتسقيـك
كنت احسبنـك كـون كلـه رحابـه
من وين ما أوجه طريقـي الاقيـك
وليـا دعيتـك جيتنـي باستجابـه
ماكنـت احسبنـك تغيـر خطاويـك
واللي حصل ماكنت حاسب احسابـه
خيبت فيك ظنون من كـان يغليـك
ماينفـع الغايـب جفـاه وغيـابـه
ولا ينفعـك كثـرة زعلـك وتغليـك
أنا تـرى عقبـك عشقـت الكتابـة
انسى بها همي ليـا حـل طاريـك
شف جرحك اللي رحت تشكي صوابه
سبايبـه درب مشيتـه برجلـيـك
باكر تجيني تشتكـي مـن عذابـه
وتقول لي مشتاق وابعـد واخليـك
وليا سألت شفيـك جتـك الاجابـه
خلاص وقتـك راح ماعـاد يمديـك
21-08-2010, 02:32 PM
العرض الشجري