مطلق بن شويه

[ناصر بن فالح]

الصدر ممحل غرام .. ومرتـوي صـدّه=والعين غصن السهر فيها ثنـى عـوده
لولاي رجل ٍ محـد وايـق علـى سـدّه=فضحني الشوق في باسـه ومجهـوده !!
أدلّـه الصـدر بيـن الضيـق والشـدّه=الوقـت دوّار .. والأعمـار مـحـدوده
لـو كـل واحـد يجـي ودّه علـى ودّه=ماطال صبر العقيم لشـوف مولـوده !!
راعي القناعه ليـا مـن الزمـن حـدّه=يرضى بحـظ ٍ ذخـر جـوده وماجـوده
يابيض الأحـلام لاتمسيـن مسـودّه !!=بشايرك فـي نواصـي الخيـر معقـوده
حي الله اللي عليـه القلـب مـن مـدّه=كنّـه سحـاب ٍ يمـد يديـه للـسـوده
أبطـى وحـس الضلـوع يقـول لابـدّه=رجله على الدرب !! وعيونه على العوده
إيّ بالله أقبل جفـول الريـم مـن قـدّه=يشيـل روض الجمـال بكـامـل وروده
كنّه بيجـزم ولْـه !! وأنـا علـى حـدّه=وأغضيت شوفي يمين شوي .. ياكوده ..
.. إليا تمثنـى قفـص صـدري ولا ردّه=ما ياخذ القلب في رمحين من سـوده !!
اللي قلـوب أكثـر العشّـاق فـي يـدّه=تسعـى لغاياتـه .. وتطّمـح لمقصـوده
لو كان ماهيـب ورث ابـوه عـن جـدّه=لكنّهـا كسـب حجانـه وعنـقـوده !!
سلمتـه الـروح وأغليتـه علـى البـدّه=يرعا مفالي حشـاي .. ويـارد عـدوده
من كثر مـا أتـوق لـه وأغليـه وأودّه=تنقص مقامات بعض النـاس مـن زوده
عليـه الأشـواق .. محتـرّه ومـبـردّه=ويلي على نفحة النسنـاس مـن نـوده
ما والله أقسى على العاشق مـن الصـدّه=الا أن كبـده بحـد المـوس مـقـدوده
لكنّـه العشـق لامـن زاد عـن حــدّه=ياكثـر ماياخـذ !! ويـاقـل مــردوده
أن حطّك براسه .. ونـواك مـن جـدّه=مايحتـرم نفسـه !! ولايمسـك حـدوده
فيه التناقض وجمع الضد مـع ضـدّه !!=حاجات معدومـه .. وحاجـات موجـوده
الله عطا (السوده) اللي ماعطـا (جـدّه)=والله عطا (جدّه) اللي ماعطـا (السـوده)