قصيدتي لحظة فوز محمد الوطيب في انتخابات الهندسة..!!

[ناصـر المري]

السلام عليكم ورحمة الله وبركاته


يشرفني انضمامي لكم في منتداكم الراقي..اللي اعتز في بوجودي فيه بين اخواني وربعي


تشرفت بطلب من الاخوان سعد محمد العكشان وفهد فلاح الضاعني بوضع القصيدة اللي القيتها لحظة فوز اخي العزيز محمد علي الوطيب في انتخابات الهندسة

وانا اقول ابشروا بالسعد واتمنى تكون القصيدة في محلها..واذا كانت مهي في محلها المراقبين ماراح يقصرون بنقلها..


في البداية اهدي بيتين خاصة لبو علي وهو يستاهل

انا البارحة شفت النجوم وقفت فالدور = تصوت..على شان البدر ينتشي نوره

الا يا محمد جبتها وانت قد الدور = وربعك لهم فالمجد رايات مشهورة

لو المجد له درة..عشانه تغوص بحور = رفعت انت روس قدلها عام مقهورة

والقصيدة اللي القيتها لحظة الفوز:

اوميت بيدي للمثايل والاوزان = وانشت على راسي بروق وهمايل

شاعر ومري وافخر بفعل راكان = وافخر بفرسان القبايل الاوايل

ياللي جمالش جمع الانس والجان = واصبح يوصف من هل الوصف هاايل

منتي مع العالم..ولا همش فلان = غصنن الى هب الهبوب يتمايل

من حولش رجالن مشاكيل شجعان = قبايلن تكاتفت مع عوايل

علميتن تاريخها هز الاركان = وتاريخها فالمجد صايل وجايل

بكرة تجيب الاول فكل ميدان = واعدها لا جيت اعد الاصايل

سلامن احلى من نسانيس لبنان = للي حضر والشك يالربع زاايل

اليوم شعري ماخذ المجد عنوان = ما هوب لام عينين وام الجدايل

ابفخر بربعن لهم ثقل واوزان = قبايلن نجم الثريا تخاايل

سلام يا يام المعزة لنجران = ربعن تدك القاع وترد عايل

وسلام للعجمان سلطان سلطان = ربعن تعدل الميل لا صار مايل

ومطران لا ذكروا هل الطيب مطران = حمر النواظر والمكارم عدايل

ولا انسى هل الفزعات والعز عتبان = افعالهم يصبح الصلب سايل

وسبعان لا ذكروا هل العز سبعان =غلبا بنبطي ما نعد الجمايل

وسلام يا شمر هل الجود والشان = ونبع الكرم ينبع من عيون حايل

وشيوخ نجد اهل المواجيب ويلان = اهل الكرم والنخوة عيال وايل

وذكرت انا ساس العرب نسل قحطان = هواجرن شلت حمولن ثقايل

ولا جيت بذكر عبس شيبن وشبان = ذكرت امجاد وذكرت الفعايل

ولا شعطان اللي يعزون جيران = اهل الظفر واهل الفعول الجزايل

ودواسرن لاصار للعز نيشان = يضرب بفزعتهم كثير المثايل

ولاجيت بذكر حرب في ماض الازمان = ذكرت ما يوري حكي كل قايل

وربعي بني مرة والى كان ما كان = نرجح الميزان لو حن قلايل

والنعم في كل القبايل الى عمان = ولا به قصورن فالعرب والحمايل

اخوان مهما نختلف ربع واخوان = وحنا تعلمنا جميل الخصايل

ابختم ببيتن ولا فيه نقصان = للبادية والحاضرة والعواايل

الهندسة..علمية..بفرق يا اخوان = ولولا العوايل...ما تفوز القبايل!!!!