همــهـــمــات سعد . . !

[سعد الصميل]

تهمهمنا . . ولله الحمد . .

وخلصنا . . ولله الحمد . .


طبعا هذي مو نهايه للهمهمات أبداً . . فـ مثل ماعودتكم في الهمهمات دائما مزعجه !!


دائما صاخبه . . صوت ضرب الكيبورد وانا قاعد اكتبها يسوي زحمه توصل للجيران !!

لكن . . .

إجازه خاصه وتغيير جو . . سفر 24 يوم وان شاء الله راجعين لكم بإذن الله . .

وان شاء الله ماراح نقطع . . لكن بالهمهمات راح تكاد تكون معدومه . . لأن حتى العقل بيكون في إجازه !!

شكرا لكم . .

اتمنى لكم طيب المتابعه دائما وابداً . .

محبكم واخيكم / سعد الصميل

[سعد الصميل]

اسعد الله مساكم . .

اسعد الله مساء كل متهمهم

وكل مشتاق للهمهمات . .

ان حبيت اسجل لكم حضوري . . علشان محد ينسى الهمهمات . .

ولنا معاكم لقاء قريب ان شاء الله . . وهمهمات Extra . . !!

[سعد الصميل]

انتهت الاجازه على خير ، ورجعنا للكويت مره ثانيه …

ورجعت لكم الهمهمات اكثر من قبل ...

اتمنى انها تكون وحشتكم وانكم فقدتوها

مثل ماهي فقدتكم .

موعدنا الليله ان شاء الله ، لـ نتفلسف عليكم ونجيب علومنا الجديده …

وكل همهمه وانتم بخير .

[سعد الصميل]

رجعنا لكم بعد اجازه الحمدلله كانت سعيده في ربوع عاصمة الضباب . .

لكن هالمره ماراح انزل موضوع وتقرير عن السفره في القسم السياحي . .

لأني قد سويت لنفس الديره تقرير سابق . . وللأمانه الكامره ماكانت معاي مثل قبل . . لكن بزعجكم بشي جديد . .


بكثف الهمهمات على مواقف صارت لي هناك . . منها اللي اعجبني ومنها العكس . .


المهم . . اني بزعجكم فيها شوي قبل تروح حلاوة السوالف فيها . .

بسم الله نبدأ . .

[سعد الصميل]

شي طبيعي اذا سافرت بتركب التاكسي كثير في التنقل . .

مع اني ماكثرت ركوب التاكسي هالمره لوجود الخبره المسبقه بالباصات والمترو . .


لكن اضطر مرات او اشتاق مرات للتاكسي . .


موضوعي مو عن التنقل . . ولا عن التاكسي . . موضوعي عن صاحب التاكسي !!

كثر مايشوفون كثير من الناس ان المهنه هذي مو على المستوى او يمكن يشوفها البعض انها تفشل . .

الا اني مرات اتمنى اعيش التجربه واصير سايق تاكسي لفتره . . مو علشان الغثا طبعا . .

ولا علشان التعب . .

لأني من الناس اللي اعتقد ان الوظيفه هذي مدرسه !!

تخليك تختلط بكل انواع البشر . . الطيب والردي . . العاقل والمجنون . . بتمر عليك شخصيات غريبه عجيبه . .

تخيل انه يركب معاك باليوم 30 راكب . . لو 3 منهم قالو لك مشاكلهم او على الاقل حصل لك معاهم موقف او سوالف او كلام غير الكلام الخاص بالتوصيله طبعا . .

كل يوم راح تعرف عن 3 اشخاص . . راح تسمع بلاوي . . تستغرب . .

راكب بتسمع منه حكمه . . راكب بتحل معه مشكله . . راكب بتشوفه اخطأ وبتعتبر . . راكب بيفتح عينك على شي . . راكب بيعطيك معلومه . . راكب بيتناقش معك . . وهلم جرا . .

صاحب المهنه هذي لازم يصير حكيم بالحياه غصب عنه مهوب طيب . .

وظيفته تعلمه بالغصب . . !

[سعد الصميل]

فيه اشياء في الحياه تحب تعرف عنها كل شي وبالتفصيل وتعرف ماوراها ودونها . . لكن بالمقابل فيه حاجات اكثر بعد مايهمك تعمق فيها وتدرس تفاصيلها . . !!

من الامور اللي ماكنت اعرف عنها شي مثلا النوم . . اعرف اني اذا نعست اروح ارقد واذا شبعت من النوم قعدت !!

فيه ناس يدرس النوم دراسه ويحسب عمره اللي راح . . ولو بيده يحسب الباقي كان جلس يحسب !!


منهم اذكر مدرس ايام الثانويه . . كان يسولف لنا عن النوم . . ويقول لو تنام 8 ساعات كل يوم . . ثلث عمرك انت مقضيه بالنوم . .

يعني لو عشت 60 سنه . . 20 سنه منها نوم !!

طيب واللي ينام 12 ساعه ؟ نص عمره طار في النوم ؟

الله المستعان . .

صاحبنا هذا يقول انا كان نومي كذا لكن بعد ماجربت التجنيد في سوريا وعشت لي سنه او اكثر انام بس 3 ساعات باليوم . . وساعه او ساعتين بالظهر مقيال . . تعودت ومشيت على النظام نفسه . .

حلو انك تعيش عمرك كامل وماتضيع نصه بالنوم . . لكن برضو مو حلو اني اعيش العمر كله هلكان وتعبان . . !

بس اعجبتني نظرته للنوم . .

نام أقل . . عيش أكثر !!

[سعد الصميل]

القوانين تم وضعها لتنظيم حياة الناس . . وجعلها اكثر راحه وترتيب . .


الالتزام فيها شي طيب . . ومخالفتها سماجه . .


لحد الآن حلوين . .

لكن فيه اوقات اذا التزمت فيها بالقانون تحس انك خبل !!

مثلا لو انك تبي تعبر الشارع . . وصرت ملتزم بالقانون ورحت للمكان المخصص لعبور المشاة . . والمكان المخصص هذا نفرض ان فيه اشارة ضوئيه . . اذا صارت خضرا اعبر واذا حمرا انتظر . .

احترام القوانين يعني انك ماتعبر الا في التوقيت المناسب . . واذا كانت الاشاره خضراء طبعا . .

لكن من الحيونه بعد انك تبي تعبر وقت الفجر مثلا والشارع اساسا فاضي مافيه احد نهائيا . . وانت بحلاتك تنتظر الاشاره تصير خضراء وتعبر !!

هنا اعتبر الشخص هذا غبي . . وانه مثل البهايم يمشي على السَنَّه بفتح السين وتشديد النون . .


اتباع القوانين واجب . . لكن في بعض الاوقات تحتاج تشغيل عقلك وقياس الامور بديهيا مو كل شي تطبقه بحذافيره . . والا بتكون شخص اخرق !!

[سعد الصميل]

مبارك عليكم الشهر ياحلوين . . ولو انها متأخره لكن منعتنا ظروف الوقت والالتزامات . .


ايام رمضان زمان يوم كان وش حليله بالشتاء و 10 ساعات صيام بس . . كنت اتبع لي طريقه غريبه . . كنت ارقد عقب الفجر على طوول واحاول اني ما اقعد الا وقت الفطور . .


مادري وش كنت احاتي بالضبط . . الجوع والا العطش ؟

لا صلاه ولا خير . . اجمعها كلها


كان صيام مش حالك . . لكن بعدين اكتشفت انه كان يكفيني شر التلفزيون والمصايب اللي تجرح وتقطع الصيام

ماكنت اعرف ان متعة رمضان بالصيام وتجربة الجوع ونشفة الريق . . !!



بسم الله نبدأ تهمهم . .

[سعد الصميل]

مره من المرات كنت في مجمع ترفيهي خاص بالاطفال اسمه ديسكفري . .


ودخل علينا وقت صلاة العشاء . . . رحت لدورات المياه الله يعزكم ابي اتوضأ واصلي بالمصلى . .

وأول مادخلت المغاسل شفت مغاسل صغيره حيل . . طريقتها كانت حلوه . . واشوف الناس يتوضون فيها . .

قلت في بالي الله يجزاهم خير . . اول مجمع تجاري بالكويت اشوفه يهتم بالمصلين وحاط لهم مغاسل نازله علشان الوضوء . .

التفت على اللي جنبي قلت له . . ماشاء الله فكره عجيبه المغاسل صراحه . .

رد علي : اي والله حاسبين حسبة الاطفال بكل شي لأن المجمع اساسا للطفل . . فـ كل شي لازم يكون مهيأ لهم !!

ماصدقت إلا يوم شفت مصلى المجمع كان غرفه صغيره محشوره بالسرداب . . ايقنت ان كلام صاحبنا سليم . . همهم الطفل مو المصلي !

حسيت اني تخدرت بعد ماسمعت كلامه . . واني كنت مسكين وعلى نياتي واقول الله يجزاهم خير . .

تعود إنك ما تحسن النيه بكل شي . . الموقف هذا علمني

[سعد الصميل]

تبي توقع إجازتك وتخليها في رمضان ؟ او تخليها تصادف العيد ؟ صعبه صح ؟

بيقولون لك زحمه وطابور ومافيها مجال . . ! وتشوف واحد جاء بعدك ووقعها وبدأ بالاجازه !

طبعا الاجازه جبتها لضرب المثل بس . . والا انا طالع اجازه من قبل رمضان ورمضان . . مخططها مبطي

لكن خلونا في الاجازه لأنها حق من حقوق الموظف على جهة العمل سواء في الحكومه او غيرها . .


شي مؤلم صراحه انك تشوف حق اصيل من حقوقك ماتقدر تاخذه بالطيب . . وماتاخذه الا بالغصب !!


في الدول المتقدمه في اوروبا واليابان وامريكا . . الكلب اعزكم الله مضمونه له حقوقه بالكامل . . كحقوق حيوان !!

فـ ما بالك بـ إنسان ؟؟ !

وعندنا حقوقك كـ إنسان تنتزع . .

وتضطر انك تنتزعها انتزاع !

وإلا ؟