همــهـــمــات سعد . . !

[سعد الصميل]

رمضانيات . .

(1)
تحاول تلطف الجو وتضحك وانت نفسيتك حلوه . . . يسويلك فيها ياخي تراني صايم ومالي خلق !

انت بروحك صايم ؟ والا انت المسلم وحنا كفار قريش ؟

هدي يالطيب . . الصيام مايلعب بالنفسيه . . بلاش افلام !




(2)
اذن ؟ لالا ما اذن . . اذن ؟ مدري والله . . قم اطلع اسمع لنا اذن والا لا . . ايه اذن اذن . .

يعني يوم كان غير رمضان ماحرصتوا على الاذان وتوقيت الصلاة بالثواني . . بس المسألة فيها عيشه صرتوا مؤمنين ؟




(3)
السفره عليها 4 اشخاص ومقابلهم ( 4 جريش - 4 معكرونه - صحن عيش كبير - لقيمات - فطاير - تشريب - شوربه - سمبوسه . . الخ )

واذا تكلم قال ياخي كثرنا بالفطور . . الله يديم النعمه . . ياخي من الاول خل فطورك خفيف نفسي . . بس تمره ولبن << ايه خير ان شاء الله



(4)
من 18 سنه والناس تسب طاش ماطاش . . وتعرضه للمطاوعه . . . و18 سنه الناس تتابعه !

من الغبي فيهم ؟

[سعد الصميل]

انت تقول رمضان قبل كان احلى . . . اخيك الكبير يقولك رمضان قبل كان احلى . . ابيك يقول لأخيك الكبير رمضان قبل كان أحلى !!

عندنا عقده في شي اسمه الماضي . .



كل جيل عنده إن ماضيه هو الأجمل !


مع إن الماضي المتيمه به كل الأجيال . . كان أساساً حاضر مثل حاضرنا الذي نعيشه حاليا . . نستطيع التحكم فيه بطريقتنا . . لكن السر في اللحظات الجميله . . هي التي يزداد جمالها في كل لحظه تمر بعدها . .



بالمختصر . . ماضيك كان حاضرا من صنعك أنت . . فإن أحسنت صياغة حاضرك . . كان ماضيك جميل . . !

[سعد الصميل]

غزو العراق للكويت كان مؤامره اصلا , وامريكا قالت لصدام ادخل وحنا نطلعك . . . الخ !

تفجير برج التجارة مؤامره بالاساس , امريكا اتفقت مع بن لادن وقالت له فجر علشان نستحل افغان ستان . . !

تهديد ايران للخليج مؤامره . . امريكا كلمت ايران وقالت هددي علشان يشترون مني اسلحه ويوقعون معاي اتفاقيات حمايه !!

ثورة مصر اساسا مؤامره . . وان حسني مبارك لحد الان الحاكم الفعلي في مصر لكن علشان يخدرون الشعب عملوا فيلم خفيف عليهم !!!

ثورة ليبيا مؤامره . . وهي اتفاق بين القذافي والناتو . . يخليهم يضربونه بعدين يقول الغزاه الصليبيين . . بعدين يغلى النفط وتستمر الازمه في ليبيا ومن صالح اللي بيمص النفط !!


كل شي عندنا نخليه مؤامره ضدنا . . ماعمرنا فكرنا بشي بحسن نيه . . كل شي يصير لنا عندنا انه مؤامره ضدنا . . !!

الخلل في عقولنا اللي تحلل كل شي على مزاجها . . وقلوبنا اللي تخاف من كل شي !

[سعد الصميل]

احلى نوع من الناس اللي عايش حياته بالكامل . . ومايهمه إلا شي واحد . . انه ماخالف الشرع او الدين فيها . .

يعني يروح وين مايروح . . يلبس اللي يلبس . . يسوي اللي يسوي . .


مايهمه كلام الناس . .


هذا يعجبني صراحه . . واعترف اني ماعندي الجرأه اني اسوي مثله

مشكلتنا اننا نراعي الناس وكلامهم اكثر ما نراعي انفسنا وحقها علينا !!

يعني لابغيت تسوي شي معين بتقول لا والله فشله يشوفوني الناس وينقدون علي !

لابغيت تروح بلد او مكان معين ودك تشوفه . . تقول لا والله فشله يدرون اني رحت هناك !! مع ان مافيها حرام المسأله لكن التقاليد القبيحه حكمت عليك

ياخي وصلت فينا اننا من المستحيلات اننا نروح نصلي بالمسجد بدون غتره او شماغ !

طيب ياخي انا بروح امشي بعد العصر ولابس رياضه . . لازم البس شماغي بعدين ارجع البيت البس رياضه ؟

في حياتنا قوانين كثيرة حطيناها في الأدب الشكلي , وليتنا حطيناها في الادب الفعلي . .

يالله . . الله يعوضكم الجنه

[سعد الصميل]

مما واجهت من سخرية التغيرات . .

اني قبل 6 سنوات . . يوم كنت مهووس تصوير . . كانو الناس يشوفوني بغرابه ويضحكون علي . . احس يقولون بينهم وبين انفسهم هذا وش علمه . . يقلد الاجانب !!

فيه اماكن كثيره كنت اخجل امسك كامرتي فيها . . لأني كنت اشوف المجتمع متخلف من هالناحيه . . !!

الحين . . تمشي بالمجمعات تشوف عيالهم متقلدين الكاميرات والوضع طبيعي . . صار التصوير هواية الشعب الكويتي كله . .

نفس الاشخاص اللي كانو يضحكون علي . . كل يوم والثاني واحد متصل فيني يسألني عن انواع الكاميرات وشنو انصحه فيه !


كل الكويت صارت تعرف تصور . . كل الكويت صارت تهتم بالصور وجودتها . . كل الكويت صارت تعرف ميزات الكاميرات والعدسات وطريقة شرح الدروس في التصوير . .

بعد ماكانت هوايه جميله كنت استمتع فيها انا وقلة من الناس . . صارت اليوم شي عادي ومن أساسيات الحياه العصريه بالكويت وغيرها يكون عندك ثقافه واسعه عن التصوير وتمتلك كاميرا احترافيه . .

وهذا شي جدا حلو . .

لكن بالنسبه لي ؟ . . خلاني ابتعد عن التصوير من كثر الزحمه اللي صارت . . وقل نشاطي وصار محدود جدا . . ولو ان التصوير موجود بالقلب . . لكن ننتظر تنتهي الموضه ونرجع مثل قبل . . ونملى لكم قسم العدسه من الصور مثل قبل

[سعد الصميل]

كل العلاقات في الدنيا . . مبنية على الثقه . .

سواء العلاقه . . تجاريه . . عمل . . شخصيه . . الخ


فـ هذي بعض الامثله :

لو انك ماتثق في اهلك . . كان بتعيش عمرك كله في شك وتصير حياتك جحيم !

لو انك ماتثق في الخادمه . . كان بيجيك تخيلات كثيره . . بتفكر مثلا انها تسوي شي قذر بالأكل . . أو من الممكن تتخيل انها تنظف المرحاض اعزكم الله في فرشاة اسنانك !!

تصورت ؟


لو ماتثق في محل الكمبيوتر اللي تودي له لابتوبك . . كان من الممكن تفكر انه بدّل لك القطع الداخليه في الجهاز كلها وحط لك قطع تجاريه بدون ماتدري !!


لو ماتثق في الشخص اللي شريت منه سياره . . كان من الممكن بعد ماتسلمه الفلوس يجيك تفكير انه من الممكن انه يحطها بمخباه ويرفض يحول السياره بإسمك بحجة انه ماتمت البيعه وانه ما اخذ منك شي !!



هواجيس كثيره تطري عليك . . اذا فكرت شوي بس لو ان الثقه منعدمه في الناس وتعاملاتهم !



الثقه نعمه . .

[سعد الصميل]

ياحليل الشيبان . .

هم صحيح انهم يقعدون الصبح . . بس النهار كله مسوي نفسه منسدح !!

وعقب الغداء يقيل شوي . . . ومن عقب العشاء راقد . . .

وحلاتهم في رمضان . . نايم نص اليوم , وقاعد تحت مكيف جنرال يكفخ عليه . .


ولا تحاكى قال الحمدلله رمضان خفيف لا تعب ولا ظمأ ولا جوع !!

ياعمي دخيل الله روح شوف المساكين اللي يشتغلون بالشوارع وش مسوي فيهم التعب ..

عسى الله يواجرهم بس . .

فعلا ياحليل الشيبان . .


خلونا برمضان بعد . .

تعرفون الحزه اللي تكلم عنها بن فطيس ؟ تالي عصير ؟

اللي هي قبل المغرب . .

الوقت هذا بالايام العاديه اكرهه جدا . . بس في رمضان بالذات يكون احلى وقت يمر عليك في يومك !!

توافقوني الراي اكيد

[سعد الصميل]

مره من المرات . . كنا جالسين في دوانيه . . وكان معانا شخص قامو الشباب استلموه

يتغشمرون معاه . .

المهم انهم في نص وقت ماهم مستلمينه . . قام طلع من الدوانيه وهم ماوقفوا طبعا . . !


كملوا حتى يوم طلع . .


بعدها بدقيقتين . . قمت بطلع من الدوانيه بكلم تلفون . . فـ كانت طلعتي خفيفه بدون كلام . .

المفاجأه الي شفتها ان الشخص اللي كانو مستلمينه . . كان واقف ورى الدريشه يتصوخ !!

حاذف اذنه ويسمع وش بيقولون عنه !!


الخلاصه من السالفه . .


بجد كسر خاطري . . النوع هذا من الناس بجد يكسر الخاطر . . ماعنده ثقه لا في نفسه . .

ولا في الناس اللي حوله . . ومايعرف وش قدره عند الناس اللي حوله . .


ودايم متوقع من الناس انهم ضده . .


الله يرحم حاله ويشافيه من عنده . .

[سعد الصميل]

مساء الهمهمات . .

صاير بالكويت قبل فتره مشكله في الانترنت . . استخدام محدود وسعر عالي جدا . . وحالتهم حاله . . !!

والمستفيد الأكبر . . الخوات الثلاث . . زين فيفا وطنيه . . حرامية الكويت الكبار . .


سعر النت بالكويت . . . بالنسبه لباقي دول العالم . . يعتبر فوق الخيال . . والسرعات تفشل . . في بريطانيا وصلت السرعه 1.5 جيجا بالثانيه !! يعني أسرع من النت بالكويت بـ 300 ضعف بس !!
النت صار بنص العالم مجاني . . وفيه بعض الدول . . تكون الدوله ملزمه في توصيله مجانا للمواطنين !!

ماعلينا . . المهم هو الموقف اللي يصير . .

الكويت أفشل شعب في ثقافة المقاطعه . . وفي الحقيقه في أمور كثيره جدا لا تحصى

ياليتنا خذينا من جيراننا السعوديين شوي . . اتصالاتهم كانت انصب من اتصالاتنا . . بس بعد انتشار المقاطعه صاروا ارخص مننا بواااجد . .

وقبل فتره قاطعوا المراعي بعد مارفعت اسعارها . . ورجعت نزلت سعرها !!


بس المسأله يبيلها شعب رجال . .



قويه ادري

[سعد الصميل]

الشخص المثقف دايم له تقدير اكثر من الغير مثقف !!

المثقفين عندنا كانوا قليل . . بس بالسنوات الاخيره زاد عدد المثقفين . .

والاسباب . . الاعلام والتلفزيون في الدرجه الأولى لأننا شعوب تكره القراءه بشكل مخيف . .

بس أحسن ناس يعجبوني اللي يستمدون ثقافتهم التاريخيه من المسلسلات التاريخيه . .

ويجيك يناقشك ويتحداك في أمور مايعرف عنها إلا انه شافها في المسلسل . .

وينسى ان المسلسلات تغير كثير في الاحداث علشان تجمل قصة المسلسل أو ان المنتج يبي القصه بطريقته هو . . !!


بس فيه الحين جيل جديد . . مثقف بس غير ثقافة التلفزيون والاعلام . .


مثقفين جدد . . يدبلون الكبد . . مثقفين الواتسآب


تحس إن الشخص اللي قدامك مجرد آيفون . . خبر يجي بالواتسآب عند خلق الله كلهم . .

ثاني يوم يتفلسف بالخبر عليك !


في اوقات كثيره . . اقول الحمدلله اني ممن يحبون القراءه . .


وبما إننا في طاري القراءه . . فيها همهمه منفصله . .


يتبع .