سوالف الحب تشقيني وتطربني=أحيان أغني لها وأحيان ما أقدرها

[شرس]

البارحه قبل نوم العين يغلبني=سافرت في رحلة جتني تذاكرها
لبيه لبيه .. ياصوتٍ يداعبني=يثير الأشجان ويحرك عبايرها
سوالف الحب تشقيني .. وتطربني=أحيان أغني لها .. وأحيان ما أقدرها
تحرك الدمع مهما كان تعجبني=وجروح الأشواق في صدري تبعثرها
يا عذب الأصوات لاناديت جاوبني=معزوفة الحب ياليتك .. تكررها
لو كان .. لو كان للأحزان تجذبني=وأفلام الأحلام والذكرى تمررها
لحظات أسرّح معك .. وأخرى تغيبني=والنفس .. بأول حبايبها .. تذكّرها
الجادل اللي غلاها فالحشا يبني=أبراجها العاليه وأطول .. عمايرها
بالورد وأخبارها كانت تجاذبني=اكتب لها رسمها وأقرأ مشاعرها
بالحب كانت تعلمني .. وتكتبني=ومشاعري بإسمها زارت .. دفاترها
اطوح الصوت لو رفعه يعذبني=وابث روح القصائد من ظفايرها
ياعذب الأصوات .. يكفي .. لا تخاطبني=رسائل الحب ما نقدر نفسرها
ولا شفت دمعات عيني .. لا تكذبني=ماعاش جوّ القصيده غير شاعرها

ناصر تراحيب