همــهـــمــات سعد . . !

[سعد الصميل]

بما أننا في الثورات


انا احسد التوانسه . . أهل ثورة الياسمين


بأنهم راح يفتخرون على مدى سنوات من التاريخ القادم . .


بأنهم كانو مصدر إلهام لثورات العالم . .


اللي ما اكتفوا فيها العرب . . بل وصلت الى اسيا وماراح توقف ابدا . .


شكرا اخواننا التوانسه .

[سعد الصميل]

بما إن بكرة الأول من أبريل


يعني ان فيه سخافه راح تنشر بكره في جريدة الراي كالعاده


تابعوها بكره , وبلغوني وشهي كذبتهم اللي بيحطونها

[سعد الصميل]

يقولون ان معرض العطور باقي له يومين ويخلص . .


قبل فتره كان فيه معرض للاتصالات في ارض المعارض . .


الفرق بين المعرضين . .


ان معرض الاتصالات كان اسمه فقط معرض اتصالات . . كان بالأساس معرض بنات !

بنات اشكال والوان . . لبس اشكال والوان كمان !


ومعرض العطور اكثر اللي يعرضون مطاوعه تبع الفودري والعبدالمحسن والفايز . . الخ


بس لا تقولون الفرق بينهم ان المطوع وجهه كله شعر . . وبنات الاتصالات تدور شعر الوجه بالمجهر



الاتصالات بينصبون عليك بعقد سنتين ويخلون اللعوب تخليك توقع وانت تضحك . .


والعطور ان شريت والا بتطلع بريح طيب . .


سبحان الله

[سعد الصميل]

في احد الايام . . بس هذي بدون كان يامكان . . لأنها قبل شهر تقريبا او اكثر شوي . .

كنت واخذ لي شوية برد على قولة المصريين . .


رحت المستوصف اخذت علاج طلعت . .


وعلى طول على صيدلية . . وريته العلاج اللي معاي قلت ابي شي طيب مابي الأدول وشغل التسكين مال المستوصفات كالعاده . .


عطاني غرغره , و حبوب حساسيه , ومضاد حيوي . .


بعد ماحاسبت , شفت كيس الحكومه . . وأنبني ضميري صراحه . . اني اخذت دواء وماراح استخدمه .


خليته معاي وبعد تفكير عميق . .


رجعت ثاني يوم للمستوصف وسلمتهم الدواء . . علشان يصرفونه لمريض ثاني . .


الصيدليه مافهمتني اول شي . . لكن بعد مافهمت اني برجع الدواء لأني ماني في حاجته . .


قالت . . الله يجزاك خير . .

طلعت من المستوصف بشعور المنتشي والمنتصر . .


مع ان المسأله كانت بس مشوار صغير . . لتبريئ الذمه واراحة الضمير .

[سعد الصميل]

بما ان اليوم جمعه . .

فـ طبيعي ان الواحد يتجهز لصلاة الجمعه . . ويترتب ويتنظف ويتعطر ويتزين . . الخ


لكن من غير الطبيعي إني قبل شوي بالمسجد يصلي قدامي واحد . .


لابس بجامة نوم . . وراسه مصلع وعيونه ماليها الغمص . .


اللي مثل هذا ماله الا كلمه وحده . . ياخي إستح !

يعني لو رايح عرس والا عشاء بتروح بالطريقه ذي ؟


والا لمقابل الناس تتزين ولمقابل ربك مش حالك ؟


ياااااخي إستح !



وبما ان اليوم جمعه . . جمعه مباركة للجميع !

[سعد الصميل]

وبما ان اليوم جمعه برضو . .


عندي سؤال : لحد الآن فيه ناس مايسوون غداء سمك الا يوم الجمعه ؟

الحمدلله اننا تطورنا من هذي الناحيه وصار السمك في اي يوم !

وبما ان اليوم جمعه بعد . .

يعني ان الناس تفنن بالطبخ . . والحلو بالسالفه اني معزوم على غداء

بس مو سمك . .

نروح نتغدى ونرجع لكم بهمهمات جديده . . وثقالة دم جديده . .

[سعد الصميل]

قبل لا اروح اتغدا . .

تدرون بشي , انا بعترف لكم .

تصدقون اني حبيتكم ؟ مع اني ما اعرف من هو المتابع الدائم ومن اللي مادرى عني . . كأشخاص .


لكن كـ متابعين للركن المتهمهم . . أحبكم في الله يا اخوان .

شكرا على المتابعه . .

** الطيبه والكلام الحلو هذا طالع مني لان اليوم جمعه والايمانيات زايدة شوي , يعني لا تفرحون , بكره بكرهكم !

[سعد الصميل]

ليش الايام تمشي بسرعه ؟

امس كان الجمعه , اليوم برضو الجمعه !

وش القصه بالضبط ؟


المشكله مو بالايام , المشكله بالعمر صار الواحد يكبر بسرعه !!

شنو ادخل المنتدى هذا عمري 22 والحين وصلت الثلاثين !!

ليش بالله ؟؟؟؟

** لحد يصدق . . 2012 ادخل الثلاثين يعني توني

[سعد الصميل]

رد الفعل عن القطيعه . . هو القطيعه !

يعني اعرف شخص كان كل جمعه يرسل لي رسائل دينيه . .


شافني ما اتفاعل معاه نهائيا . . انقطع !


حصل وتذكرته بعد مرور سنه . . وارسلت له في احد ايام الجمعه رساله دينيه . .


رجع وصار يرسل لي كل جمعه . . . وكالعاده . . مل ووقف رسايل لأني مطنش !


حل القطيعه الوصل . . الله يجعلنا من الواصلين بالمسلمين والاقرباء .

[سعد الصميل]

بما اني طريت العمر . . خلوني ارجع شوي . .


تكون قايم من حلات نومك . . .


الغمص بعيونك . . شعرك مايمر عليه المشط طبعا . . مالك خلق لنفسك . .


رايح للمدرسة وانت تبي فرقاها . .


تدخل الساحه . . . تسمع الاذاعه . .





عبدالباسط عبد الصمد . . يغذي مسامعك بذكر الله . . تنشط معاه شوي . .

تتلذذ باستماع القرآن . .


الله على ذيك الايام . .


ماجاتكم البكيه ؟