مصافحتي الأولى لصدى المشاعر( رديه بيني وبين فهيد بن عصيدان)

[نـاصـر]

السلام عليكم ورحمة الله وبركاته

هذي رديه بيني وبين أخي الشاعر المبدع فهيد بن عصيدان وهذي أول قصيده لي أنزلها بالمنتدى وأتمنا انها اتحوز على رضاكم وترتقي لذائقتكم الشعريه ..
,
,

ألا يافهيد يازبن الونيّه=رفيقي فالّليال الاوليّه
صحيبك من غرابيل المحبّه= تغربل وأصبحت حاله شقيّه
الى مني دلهتْ وقلت ابسلى=عن اللي فالهوى عذب خويّه
تزاورني طيوفه في منامي=وافز وخاطري يفضى خفيّه
أبو خرسٍ تقول ان كن هدبها=محاديد السيوف الفارسيّه
إلى منّي شبحته وألتفت لي=أشوف الموت وسيوف المنيّه
ياسعدي من قبل عرفه وشوفه=حياتي من قبل عرفه هنيّه
صبرت ولين شفت السد باحي=وانا فالصبر مالي مقدريّه
وصلك الخط ياقرم العيالي= عسى عمرك مع سنينك مديّه

وهذا رد الشاعر فهيد بن عصيدان:

قصيدي جزل وإكفوفه نديّه=لجيته مايقصر بالعطيّه
يترجملي معاناة الحنايا=من إمعاناة لـ. إبيوتٍ مليّه
وعلى طاري الشعر وأهل القصايد=وعلى قدح اللّحون السامريّه
رساله جات ( صندوق الرسايل)=ياحيّ القاف .. والمرسل ياحيّه
رفيقٍ صاملٍ وقت الشدايد=ولاعنده هياط إمهايطيّه
قعدت أقراه وألاحي بيوته=قريته مرّه .. وعشره .. وميّه
بعد جتني بيوتك يارفيقي:=(هلا يامرحبا يالله حيّه)
أنا خابركْ مالك فالمحبه=ولالك فالهوى روحه وجيّه
أنا قبلك مشيت الدرب ذيّا=على عمياي والنيه مطيّه
وعذّبني رفيقٍ مايراعي=يورّدني على حوض المنيّه
يعرّض قلبي لكيّ المياسم=وِيلحق كيّته الأولى بكيّه
تركته وإنجلا همّي وغمّي=وسحبت: (إبطاقتي والتابعيّه)
وصار إيفزّ .. وإيعدّ النجومي=وصرت آناملي نومه هنيّه
أبنصح كان تسمع لنّصيحه=تقبّل وإعتبر هاذي هديّه
تغانم مخرجك .. (وإركز كراعك)=ولاتقعد على حالتكْ ذيّه
أخاف إتصير ( قيس بن الملوّح)=وتموت بحبّ ( ليلى العامريّه)

,
,
وسلامتكم