افرد جناح السعاده فـلْ حاجبـها=الضيقه اللي بقلبك مالها داعي

[عبدالناصر آل عبدان]

أحبائي لكم حبي وأعتذر لغيابي المبرر
بالدراسه والسفر وأترككم مع تواصل جديد ومتواضعه أتمنى
أن تصل إلى ذائقتكم الرفيعه ....
.
.
.

افرد جناح السعاده فـلْ حاجبـها=الضيقه اللي بقلبك مالها داعي

ساعات دمع المحاجر ما يعذربـها=والعين من كحلها ما هيب ترتاعي

قد لي شهورن على عمري مصعـبها=كن الزعل غيمتي والضيق مرباعي

أسج فكري و أدوج الرجل وأشعـبها=مرات واعي ومـرّه ماني بواعي

أضرب مع الناس خانه كنت شاطبها =لا عـلـّها ما تـنـقـّـض باقي اوجاعي

اصد عن طاري الذكرى واجنبـها=لكنّها وسط جوفي بين الاضلاعي

إن جيت أبي أنسى تـِـذَكـّرني مراكبـها=وشوق المواني يحن لفلة شراعي

حتى نسيم الشواطي من هبايبـها=لحن المفارق يجره داخل أسماعي

يشقيني الصوت والدنيا مجربـها=الآمال غابت ومنها قـلـّـت اطماعي

تشبهني الشمس لاجا وقت مغربـها=تغيب واغيب وافقد نور واشعاعي

لحظة غروب المشاعر كنت حاسبـها=لحظه! ومرت سنه وحسابنا ضاعي

ما عاد يمدي السعاده يا معذبـها=فات القطار وتوقف بيننا الساعي

حزن الملامح بقى للعين حاجبــها=من قال لك ضيقتي ماكن لها داعي

وسلامة

قلوبكم





عبدالناصر
آل عبدان