يالله تعديها على خير وتصيب = من حدني أكتب خماله وعيبه
يبقى الصراحه مابها شك أو ريب = بقولها والناس كل وطيبه
الحر ما ينفع بليا مخاليب = والعقل للرجال زينه وهيبه
والسالفه ما هي بلحية مواجيب = كل"ن" على طبعه يجيبه حليبه
بعض المنابت للمراجل عذاريب = وبعض المنابت للمراجل خصيبه
رجل"ن" يبي طاريه عند الأشانيب = ورجل"ن" يبي طاريه عند الحبيبه
رجل"ن" يودي بالسواليف ويجيب = ورجل"ن" سواليفه لفعله تجيبه
رجل"ن" يغض الطرف عن جارة صحيب = ورجل"ن" عيونه في محارم صحيبه
ورجل"ن" تسد بغيبته يومه يغيب = ورجل"ن" ولا تقدر تسد بمغيبه
ورجل"ن" يغيب ويفقدونه هل الطيب = ورجل"ن" ليا من غاب محد"ن" دريبه
ورجل"ن" اذا أخطى يرى نفسه مصيب = ورجل"ن" اذا أخطى يراها مصيبه
ورجل"ن" تشوف بخوته لك مكاسيب = ورجل"ن" تشوف بخوته لك غليبه
قلت الصراحه مابها شك أو ريب = كل"ن" على طبعه يجيبه حليبه
اشره وشره كان تبغي المواجيب = عط حق تاخذ حق مابه معيبه
العرض الشجري