طلب آخر لقصيدة الهزاني من ابو الوليد وابو حمد الشامري يجيب

[ابوحمد الشامري]

طلب الاخ العزيز ابو الوليد قصيدة للهزاني التي مطلعها ( ليلة يجينا السيل ) بعد

طلب الاخ العزيز ابو عيد لقصيدة الهزاني ولا اقدر اشوف بني عمي يطلبون مني

شيء وانا اقدر عليه واردهم خايبين ولك هذه القصيدة يا ابو الوليد التي طلبتها:



( قصيدة غزلية رائعةمخاطبا فيها زيد ويرثي فيهامحبوبتة ( عثمانه) )


ليلة يجينا السيل يازيد وافيت === موضى الجبين وسيد تلعات الاعناق

شميت ريح امجدلاته ومزيت === ضواحك ما قبلى احد لها ذاق

جلست أنا وياه في ربعة البيت === سقوى انتساقا بيننا خمر الارياق

وسقانى الخمر المصفى وثنيت === خمر وانا اسقيته حليب وترياق

يوم ارجهن اصويحبى وارجهنيت === والكل منا عقب خمر الهوى فاق

فهقت راسه بالجدايل وحبيت === ورد على خده كما صفح الاوراق

رفعت راسى للكواكب وراعيت === ولا ان نور الصبح بادٍ بالافلاق

بغيت اقوم وشد ردني وشديت === جيده وحبيته ثمان على ساق

وحلف على ان قمت من ذا وشديت === إلا انت معطينى عهود وميثاق

إنك اتعود لي الا لي منك اقفيت === ولا لغيرى من هوى البيض تشتاق

واقسمت له بآيات عما وبالبيت === والمدعى واللي بنى سبع الاطباق

إنى فلا غيرك من البيض هاويت === ولا لغيرك من هوى البيض مشتاق

انا الذى من حر فرقاك فريت === أنوح كالبهلول في وسط الاسواق

ياما طلبت الله وياما تمنيت === وياما دعيته عند حزاة الاشراق

وياما دعيته في المساجد وصليت === وياما شحذت الله قسام الارزاق

يبنى لخلي من اجنان العلا بيت === ومن الثمر نقطف ثمر كلما لاق

عسى إلى رق البكا واستمريت === منقشات الريش زينات الاطواق

واستانست روحى لروحه ودشيت === سوقه ووافق مرتي حين ما واق

قلت المواصل قال ماغيره اشفيت === قلت السلام ورد مثله ولا عاق

قالت رجينا الله يجيبك إلى جيت === عذب النبا الغالي مراشيف الارياق

هو انت طالبني تبي شيء وعييت === يا من هواه المهتوى خاطرى شاق

تبغى الدبش قلت الدبش عندنا هيت === والله مالى غير لا ماك علاق

ترى الشفات إلى لفاك النبا إيت === ساعة يقيف السوق عن كل مراق

لو ما عليك احد من الناس دزيت === فانت إ يت لازم قبل غيبات الاشفاق

قلت ارجي ان الله يديمك وحبيت === عذب النبا الغالى مراشيف الارياق

ومبكى من الفرقا جميع وياليت === من لام فرقا سيد حم الشفا لاق

يالموت ما أخذت أربعميه وخليت === خلي فلا ظني بمثله حدٍ ساق

يالموت عقب اقويت لي ويش خليت === ماعقب عثمانه من البيض ابا شتاق

يا زيد انا كد لي زمانين ما ريت === خلن سوى خلي إلى جيت له ماق

إن كان روح الحي تسعى مع الميت ==فانا الذى مع ريح ريحان الاشواق

يا ما سعت روحي مع الريح لقويت === بازكى سلام عم بالطيب الآفاق

تحياتي

ارجهن = هدأ ,,,,, فهقت = رفعت رأسه ,,,, إ يت = تعال ,,,, السوق = بلغة اهل نجد هو الطريق

دزيت = أرسلت ,,,,, كد = قد ,,,, ماق = تاق , طغى

[فيصل بن حجرف]

لاهنت يبوحمد

ورائعه من روائع القصيد

تحياتي لك

[cool]

السلااام عليكم ورحمة الله وبركاااته

تسلم ابو حمد الشااامري على القصيده وعلى تنفيذ طلب اخينا ابو الوليد .

قصاااايد الهزااااني كثير الناااس يحبووونها ومعجبين فيهااا ولا ينلامون.

الله يعطيك العاااافيه على جهوودك الاكثر من رااائعه ولا هنت اخي الغاااالي.

كـووول

[ابوحمد الشامري]

مرحبا الفين بالاخ العزيز ابو عبد الله ولقد اسعدني مرورك

تحياتي

[ابوحمد الشامري]

مرحبا الفين بالاخ العزيز كول واشكرك على مشاعرك الطيبة .

تحياتي

[أبو الوليد]

تسلم يمينك يا بوحمد عز الله انك كفيت ووفيت يالقرم

والله انك مفضل علينا يا بوحمد وهذه مو غريبه عليك

مع تحيات أخوك أبو الوليد

[ابن مكتوم]

لا هنت يا ابو حمد على القصيده الاكثر من رائعه





بن مكتوم

[ابوحمد الشامري]

مرحبا الفين يا ابو الوليد تستاهلون كل خير يا بني عمي يا النشاما

تحياتي

[ابوحمد الشامري]

مرحبا الفين بان مكتوم واسعدني مرورك

تحياتي