يا خلف هذال..!!!

[حسن العرجانى]

أسعد الله جميع اوقاتكم..

المكان اللي جمعهم والغلا من مده = يستفز بخاطره تسعين مشهد ماضي

لو وقف واحد . هنا. في يوم وابدى سده = ما يهمه نظرة التاريخ واكبر قاضي

والخطا لو هو زمانه كثّره ما عده = في قرارة نفسه اكبر من خطا يغتاضي

لو عطاه اليوم شي..وجاه بكره رده = ما الحقه بعض الحسوفه بالمقدر راضي

كم زمانٍ ربّعه لو كان ماهو وده = وكم عيونه خايلت برق السما لا ناضي

وكم طريدٍ جوّده واتلا التلايا هده = وكم طريقٍ متّره لو كان ماله حاظي

شي واحد في الحياه اللي وصل به حده = قلبه اللي ضاع نص ونص قد هو قاضي

يا خلف هذال شطرك كم صويبٍ عده = ( مونسٍ في وسط عظم الساق حرّ الشاظي )!!

كل ما اشفى للمنام شوي.. هجسه لده = لا خلا باله نهار..وليل ما هو فاضي


ايه يا طعم السهر (الله يلعن جده)!! = يستثير بخاطره تسعين مشهد ماضي



وسلامتكم جميع

حسن العرجاني

[اطياف الماضي]

الله صح لسانك يالعرجاني


تحيتي

[فيصل بن حجرف]

يامرحبا ومسهلا بالشاعر حسن العرجاني
وصح لسانك على القصيده الجميله
وننتظر منك المزيد من القصائد في هذا القسم

[عـزام]

لله درك يا أبو واسم

مهما قلت شهادتى فيك مجروحه

صح الساانك مدد مهوب عدد

ولاهنت

[بعيد الهقاوي]

صح لساااااانك ياحسن مليون مره ولا تكفي

شي واحد في الحياه اللي وصـل بـه حـده
قلبه اللي ضاع نص ونص قد هـو قاضـي

الله يرحم الحاااااااااااااال.

[مـحمـد]

الاخ حسن صح لسانك ولاهنت
على القصيده الفريدة المعاني
بانتظار جديدك دائما
والزين مايجيب الا الزين

[العبرةالحائـرة]

صح لسانك يا خوي حسن العرجاني .. ونتظر جديدك

[هداج تيما]

حسن العرجاني يا مرحبا ومسهلا
قصيدة من درر لا هنت يا السنافي