قصيده عن الجمس

[ولد مرزوق]

السلام عليكم

مساكم الله بالخير جميعاً كلن باسمه

انا عضو جديد على هذا الموقع

وانا اتشرف معرفتكم جميعاً وانشالله ما اكون ثقيلاً عليكم ولاعلى ديوانكم ذا

وهذي قصيده بهديها لكم وهذي القصيده لشاعر عرجاني والله اني ما اعرف اسمه وانشالله انها تحوز على رضاكم

القصيده :
راكب الي ما تجيبه وكالة بال بيــــــــــــــد *** ولا يجيبه بهبهاني ولا وضيحي قطــــــــر
ادهمن وسم الجميحي على جنبه جديــــــد *** مهبل الي عرض يحسب انه شفـــــــــــــر
جمس شكمانين ملقبينه بالولـــــــــــــــــيد *** من سرى به مايغبط القصيبي والجبـــــــر
كاتبين في ضمانه حديده ما يبـــــــــــــــــيد *** تمرة قاري عليها حفيد ابو بكـــــــــــــــــر
كن وجهه لا نطحته تشعشع صبح عيـــــد *** وان قفيته كأنه السيل لا سال وحـــــــــــدر
وان عرض لك في مزاياه من عنق الفريد *** ولا ركبته تحسب انك على سطح القمـــــر
دقته نغمة عبادي على سلم فريــــــــــــــد *** لا عزف الاول جاوب على عاشر وتـــــــــر
لأ شتغل قالت شكامينه ارسل يا حديـــــــد *** والتروس تقول للقاع ولي يا فقـــــــــــــــر
والبلوف تقول للكهرب هل من مزيـــــــــد *** والسيور تقول للمروحه هل من مفــــــــــر
وكن في الشكمان الايمن صدىعبدالمجيد *** وكن في الشكمان الايسر صدى نايف صقر
تحت كبوته من الفن طيران وعبــــــــــيد *** ما يغنون المسافه ولا طال السفـــــــــــــــر
كل اغنيهم على الدرب واصل يا عنيــــــد *** لين تلفي قصر شيخاً على العليا شهــــــــر
سايقه من صلب ربعي وله باساً شديـــــد *** ما يهاب البعد والليل والموت الحمـــــــــر
من صناديد ال عرجا هل العلم الوكيـــــــد *** لابتن من جن تمشي على هيئة بشـــــــــر


سامحونا كان في الموضوع قصور

[زبون كيمو]

مرحبا بك وان شاء الله تكون من الاعضاء المميزين في منتدانا
والقصيدة،، ولا احلى

[فيصل بن حجرف]

مرحبا بك يا ولد مرزوق

وتشرفنا بك عضو جديد في منتدى العجمان

ولاهنت على القصيده وصح لسان قايلها

[alajmiali78]

السلام عليكم ورحمة الله وبركاته
الله لا يهينك يا المرزوقي على المشاركه والقصيده للشاعر ضيدان بن قضعان .
للعلم فقط .
وشكرا .

[العرجاني]

الاخ / ولد مرزوق


لاهنت على كتابة القصيده

ويعطييك الله العافيه


وتسلم يالغالي ...




اما بالنســبه للقصــيده فهي للشاعر العملاق/ ضيدان بن منصور بن قضعان العرجاني



واكرر شكري لك ولاختيارك القصيده



وتقبل تحياتي


اخوك/ ابو فيصل

[ولد مرزوق]

السلام عليكم
لاهنتو ياشباب جميعا كلن بأسمه على الردود الجميله
وانشالله بتلقون مني مشاركات راح تعجبكم وتعجب زوار الموقع
واشكر alajmiali78 والعرجاني على المعلومه
وشكراً